Xixón llena les sos cais, habitaciones d'hotel y sableres mientres el branu. La so condición de ciudá costera, l'efectu llamada del clima oceánicu y el bon momentu de popularidá que vive la cultura y el turismu n'Asturies convierten branu a branu a Xixón nun destín cada vez más turísticu y popular. D'esta forma, destinos habituales pa la población local como la sablera de San Llorienzo, la Cuesta del Cholo o Santa Catalina conviértense en llugares enllenos y de muncho más mal accesu. Pruye topar alternatives, pero XIxón ye muncho más grande de lo que paez.

Picu’l Sol

De llombu a la ciudá, dende'l cumal d'esta montaña de casi 500m d'altitú pue esfrutase de la meyor panorámica de Xixón. Sobre La Camocha y Llavandera álzase esti impresionante mirador y puntu crucial pa los aficionaos al parapente o al ciclismu, yá que cunta con una complicada ruta en bicicleta. Dende'l so cumal ye posible achisbar cada rincón del conceyu de Xixón, dende la Llaboral hasta'l Musel, pasando peles parroquies d'interior, el conxuntu de sableres y barrios estremaos como Veriña. Amás, por si fuera poco, el Picu’l Sol dexa acolumbrar tamién Uviéu, partes d'Avilés, Lluanco y Candás, amás del Cordal Cantábricu y l'infinitu mar homónimu.

Sablera de Peñarrubia

Separada de San Llorienzo por un paséu de menos de trenta minutos o un pequeñu trayectu en coche, esta sablera regala l'arenal más guapu de tola ciudá. Arrodiáu de serrapatosos cantiles y miradores, Peñarrubia cunta con mediu kilómetru d'arenal y un anchor mui dependiente de les marees. En pleamar, queda aseguráu un divertíu bañu, con un únicu precuru importante a tener en cuenta, el so predresu fondu marín. En baxamar, queda llibre un paséu xigante de sable y piedres pa tomar el sol o folgar.

Solía ser una sablera nudista, pero agora queda esta actividá reservada solo a una parte de Peñarrubia. Amás, cunta colos servicios básicos de salvamentu y llimpieza y con otros adicionales como merenderos, aparcamientu y el camín asfaltáu pa coches, bicicletes y peatones.

La cultura al rescate

Yá que'l Muru de San Llorienzo, les terraces de Cimavilla, los negocios de la Ruta o los chigres de Poniente tán llenos, el turismu y el calor emburrien a la población local a acoyese a otros planes hasta que'l branu termine. Amás de l'amplia ufierta cultural que'l branu apurre, al traviés de conciertos, festivales de música tradicional o la Selmana Grande, munches plataformes culturales siguen ufiertando planes ya interesantes eventos fuera del acutáu marcu temporal de los principales acontecimientos del calendariu.