Na desembocadura del ríu Lliberdón, al norte del conceyu de Colunga, Asturies pue presumir de caltener una de les meyores sableres del mar Cantábricu: la sablera de La Griega. Esti quilométricu arenal presenta un paisaxe inigualable gracies a los sos numberosos cantiles y a les verdes fasteres de los montes qu'abracen la sablera y a l'ancha capa de sable claro que llega hasta'l mar que, ayudáu pol Lliberdón, regálanos dos sableres opuestes según baxe o xuba la marea.

En baxamar, la sablera escuéndese; en pleamar, ye infinita y viaxa pela historia: si daqué diferencia a La Griega del restu de sableres del norte peninsular ye la presencia de restos fósiles de va 150 millones d'años. Esti fechu únicu y la so cercanía con otros importantes escenarios del paisaxe costero asturianu, como Llastres o La Islla, convierten a La Griega nuna sablera incomparable.

Les icnites y el pasu del tiempu

Les icnites reflexen les buelgues d'un grupu de dinosaurios xigantes, saurópodos, qu'habitaron la zona mientres el Xurásicu, cuando La Griega yera una llaguna enfollagada xuntu al mar. Amás d'estes buelgues, qu'algamen casi l'altor d'un ser humanu nel so máximu tamañu, el terrenu caliar qu'arrodia l'arenal acueye tamién buelgues tridáctiles, de menor tamañu. Esto restos fósiles coinciden cola presencia cercana del famosu Muséu del Xurásicu d'Asturies, tamién en Colunga, y que pue constituyir un interesante añedíu a un divertíu día de sablera.

El Muséu del Xurásicu d'Asturies abre tolos díes pel branu y concentra nos sos 2.000 metros de planta una esposición permanente inédita, que percuerre la historia de los dinosaurios mientres tol periodu Mesozoicu, estremáu en Triásicu, Xurásicu y Cretácicu. Amás, cunta con esposiciones temporales, una cafetería y una destacable cantidá de xuegos y actividaes pal públicu infantil, asina como unes impresionantes vistes al conxuntu de La Griega, el Cantábricu y Llastres.

Sienda Costera hacia La Islla

La contorna de La Griega dexen llevar a cabu una ruta al traviés de la sienda costera que la xune con La Islla, la sablera más visitada de Colunga. A lo llargo d'esti camín, qu'algama los 12km, vamos poder disfrutar d'una vista privilexada de Llastres o de la sierra del Sueve, amás del conxuntu de buelgues de dinosauriu y d'un constante mirador peraltu sobre'l mar. La ruta nun tien pendientes mui pronunciaes nin espacios de mal accesu, polo que supón una bona opción pa disfrutar del senderismu ensin torgues insalvables nin una dificultá llimitante.

Amás, el camín bordia la mariña pero dexa al pasiante somorguiase na flora y fauna de la mariña asturiana. El so frutiegu terrenu dibuxa una verde viesca enllena de felechos, castañales, pinos, carbayos y ocalitos, y nun ye complicao cruciase con esguiles o rebaños de cabres.

Un bañu en La Griega

Tres disfrutar del camín, de les buelgues y de la exuberante guapura del paisaxe, La Griega regala un arenal de 1km de llongura y afectáu nel so anchor pola variable marea, a lo qu'afecta tamién la desaguada del Lliberdón, qu'encrucia la sablera. Anque l'espaciu pa valtase o caminar pol arenal ta más qu'aseguráu, xuba o baxe la marea, ésta pue ser un interesante medidor pa escoyer qué actividá realizar una vegada llegues. Otru aspectu positivu del arenal ye l'ausencia de piedres, conglomeraos o otres torgues nel terrenu.

L'imponente tamañu de la sablera asegura un bañu risonderu, casi en mar abiertu, y un relaxante arenal sobre'l que valtase, xugar a les cartes o comer daqué. El fotoxénicu paisaxe y el vientu que mece'l monte van facer el restu.