El Muséu Etnográficu del Oriente d'Asturies amplía los sos espacios espositivos gracies a la musealización del so horru. L'exemplar, qu'hasta agora permanecía zarráu, foi treslladáu dende la localidá canguesa de Santianes de Molenes de Fola pa la inauguración, nel añu 2000, del Muséu. Nel so interior, dispunxéronse distintos elementos propios del usu tradicional de los horros, que fueron tantu espacios d'almacenamientu como d'habitación.
Asina, pola so función como tenada o despensa pueden reparase productos de la güerta y alimentación; por esa mesma función d'almacenaxe, tienen cabida los preseos de llabranza y otros preseos domésticos. El tamañu de les families y l'escasez de vivienda obligó, n'ocasiones, a utilizalo como cuartu, polo que tamién un espaciu del horru dedicase a esti fin.
Esti nuevu espaciu visitable xunese a les novedaes que'l Muséu foi incorporando mientres esti branu, con una sala dedicada a los instrumentos de cocina, inspirada na obra de la primer antropóloga asturiana, Purificación Viyao Valdés, y un espaciu funerariu.