Tres les sos obres, el sábadu 15 de marzu'l teatru La Benéfica va reabrir les sos puertes al públicu con una gran Nueche en Danza. El programa d'actividaes va empezar dende pela mañana y va ser un día enllenu de dinámiques llevaes a cabu por distintes asociaciones del pueblu.
L'actividá que va estrenar l'Antroxu en Danza a les 10:00 va ser un taller de mázcares gratuitu qu'entama Raposu Roxu, de la mano de les artistes Laura Bitxo y Wenyuri. Les places pa participar nesti taller yá tán completes.
A partir de les 14:00 va haber una fabada popular previa al Gran Desfile. Pa esta comida pídese a tolos comensales que lleven platu y cubiertos propios col fin d'amenorgar borrafes, amás de mercar el so ticket por 12€. Esta comida va dar la enerxía necesaria pal desfile, que va empezar a les 16:30. Como se trata d'una fiesta de mázcares, encamiéntase asistir amarutaos.
Una gran variedá d'asociaciones del conceyu van enllenar les cais desfilando. Un añu más, van participar los cabezudos de Veiga acompañaos de la música de la orquestina la Xarangana y la banda Los Muiles.
El desfile va salir de la Plaza María Josefa Canellada, xunto al Mercáu d’Abastos, avanzando pela Plaza Mayor y la Cai del Quesu, siguíu de la Plaza del Conceyu, la Cai Cuadonga, pasando frente al Restorán Los Llantares de Pelayo y la Residencia de Mayores de L’Infiestu, hasta rematar de regresu na Plaza de La Benéfica. Calcúlase que va terminar a les 18:30, y al rematar va apurrise'l premiu al meyor disfraz pa los pequeños. El concursu de mayores y la tradicional rifa d'Antroxu van esperar hasta la nueche.
A les 19:00 van empezar los preparativos pa la Nueche en Danza gracies a Santi Galguera, que va impartir llecciones de baille tradicional hasta les 20:00. A partir d'esta hora va tener llugar la Nueche en Danza.
