Hai nomes que paecen nacer xuníos a un llugar. En Riosa, ún d'ellos ye L’Angliru. La montaña que se convirtió nún de los grandes símbolos del ciclismu internacional fixo que'l conceyu seya conocíu muncho más allá d'Asturies, pero quedase namás coles sos ramples sería dexar fuera bona parte de lo qu'esplica esti territoriu de la Montaña Central.
Porque Riosa ye tamién una tierra d'antigües esplotaciones mineres, de pequeños pueblos asitiaos ente montes y de caminos que siguen el cursu del agua. El conceyu estiéndese per una parte de la Sierra del Aramo y axunta un paisaxe de fuertes desniveles nel que l'actividá humana dexó una buelga qu'inda pue reconocese.
L’Angliru
La carretera xube dende Viapará escontra una de los cumales más conocíos del ciclismu mundial. L’Angliru nun precisa demasiaes presentaciones: les sos ramples, especialmente les de Cueña Les Cabres, convirtiéronlu nún de los puertos más esixentes de les grandes vueltes y nuna referencia pa los que busquen encarar sobre dos ruedes una de les ascensiones más dures d'Europa.
Pero la xubida tamién dexa descubrir otra dimensión de Riosa. A midida que gánamos altor, el paisaxe de la Sierra del Aramo va tomando protagonismu y les vistes ábrense sobre lal Montaña Central. Turismu Asturies define la redolada como ún de los grandes espacios naturales y deportivos del conceyu, integráu nel Paisaxe Protexíu de la Sierra del Aramo.
Nun fai falta enfrentase a la carretera como un ciclista profesional p'averase a L’Angliru. L'ascensión pue formar parte d'una visita en coche, con distintes paraes pa contemplar el paisaxe, anque convién tener en cuenta que se trata d'una carretera de montaña y que les condiciones puen camudar según la dómina del añu.
Rioseco y Texeo
Dende'l cumal, el viaxe camuda de dómina. Nes proximidaes de Ḷḷamo y Ruseco apaez otra de les grandes histories de Riosa: la minería. El cobre y el cobaltu fueron esplotaos nesti territoriu dende tiempos prehistóricos, muncho primero de que la minería del carbón tresformara bona parte de l'Asturies central. El complexu de Texeo ye ún de los exemplos más singulares d'esa llarga relación col sosuelu. Turismu Asturies asitia ellí esplotaciones de cobre que se remonten aprosimao al añu 2000 enantes de Cristu, al pie de restos de los llabores desenvueltos darréu mientres los sieglos XIX y XX.
La ruta hacia les antigües mines sal de Ḷḷamo y pasa per Rioseco, onde inda puen reconocese construcciones rellacionaes cola última etapa d'esplotación minera. El pobláu caltién parte de les viviendes y de les instalaciones vinculaes al tratamientu del mineral, convirtiéndose nuna especie de puerta d'entrada a un paisaxe industrial muncho más antiguu de lo que podría paecer a la primer vista. El percorríu sigue hacia la Campa Les Mines s y los antiguos llabores de Texeo. Ye un itinerariu de montaña, d'unos ocho kilómetros y con un desnivel cercanu a los 600 metros, polo que se necesita una preparación acordies coles sos característiques. Les antigües galeríes prehistóriques nun han visitase por llibre nin entrar nelles.
L'interés del llugar ta precisamente en poder caminar per un paisaxe onde se superponen diferentes dómines de la minería. Les antigües esplotaciones prehistóriques conviven coles instalaciones de los sieglos XIX y XX, mientres el monte foi recuperando bona parte del espaciu que mientres décades tuvo ocupáu pola actividá minera.
La Ruta del Agua
Pa terminar d'entender Riosa hai que siguir otru elementu fundamental: l'agua. La Ruta del Agua conecta la redolada del túnel del Aramo con Ḷḷamo y dexa percorrer un paisaxe nel que naturaleza ya intervención humana apaecen rellacionaes. L'itinerariu forma parte de los recursos destacaos por Turismu Asturies pa descubrir el conceyu y ufierta una perspectiva diferente a la de L’Angliru y les antigües mines.
Equí'l monte dexa de contemplase dende los altores y percuérrese a pie. L'agua acompaña'l camín mientres el paisaxe va amosando pequeños pueblos, vexetación y diferentes elementos vinculaos al aprovechamientu tradicional de los recursos naturales.
Ye tamién una bona forma de completar el percorríu porque ayuda a entender que la historia de Riosa nun s'esplica namás dende les sos grandes cumes o les sos mines. Ente una y otra apaecen caminos, cursos d'agua, caseríes y pueblos que formen parte d'una manera d'ocupar el territoriu que se caltuvo mientres xeneraciones.
