Güei traémosvos una ruta nún de los conceyos más pequenos y con menor población de Asturies, Yernes y Tameza. La ruta, denominada Ruta de los Cascoxos, va dexar conocer la naturaleza d’esti casi desconocíu conceyu, pero non por ello menos interesante.
Salimos d’el Llanón, en San Miguel (Grau), xubiendo pel antiguu camín que xube dende’l ríu Cubia pel llau esquierdu del regueru de la Trapa, hasta Vindías, aldega de Yernes, nun trayectu de xubida nidia que s’allarga mientres hora y media. Dende Vindilles vamos hasta Yernes, onde podemos faer un altu nel únicu chigre del pueblu, pa tastiar productos de la zona, pan d’escanda, quesu Afuega’l Pitu o chorizu, ente otros.
Al salir de Yernes pela carretera que conduz a Villabre, facémoslo dexando a la derecha la Sierra de Pando, que vamos dir bordiando a lo llargo de la ruta. A unos trescientos metros tomamos un camín que va escontra la derecha en dirección a les brañes de la Trapa. Dende equí tenemos una panorámica especial contemplando la sierra d’el Pedroiro, El Picu Curio, Peña Mantega y el Camín Real de la Mesa en casi tol so percorríu.
Dende la Trapa, baxamos per un camín empináu que s’esmuz pela falda de la Sierra de Pando, pela so cara norte hasta’l Mortuorio, para depués dirixinos a San Miguel cruciando la ponte sobro’l ríu Cubia pa finalmente acabar n’el Llanón, llugar onde empezamos la ruta.
- Conceyu
- Yernes y Tameza
- Sección
- Curiosidaes
- Fecha
