Cabrales, en plenu corazón de los Picos d'Europa, ye un paraísu pa los amantes del senderismu. Los sos paisaxes espectaculares, los sos pueblos de monte y la so cultura rural faen d'esti conceyu asturianu un llugar únicu pa percorrelu a pie. Nesti artículu proponémoste 5 rutes imprescindibles p'afayar Cabrales pasu a pasu: dende escobios llexendarios hasta miradores con vistes inolvidables. Ponte les botes y preparate pa namorate del monte.
Rutal'l Cares
Nomada como “La Garganta Divina” esta ye una de les rutes más mítiques de Cabrales y d'Asturies, amás de tar considerada de los meyores de senderismu d'España. El paisaxe ye impresionante: cascaes, roca caliar, cabres monteses, ríos y miradores naturales. Amás, el senderu ta escaváu en roca, con túneles, pontes colgantes, pasos sobre escobios y cantiles faciéndola entá más característica.
Ta perbién señalizada y transitada a lo llargo de toL añu, pel branu, inclusive, masificada. Son 24 los kilómetros a percorrer en total, una y bones la distancia ente Poncebos y Caín ye d'aprosimao 12 kilómetros, y ye llinial, esto ye, al llegar a Caín vuélvese pel mesmu senderu pel que se foi. El tiempu envaloráu de percorríu ta ente 6 y 8 hores y media d'ida y vuelta.
Canal del Texu hasta Bulnes
Esti camín yera l'accesu tradicional piatonal a l'aldega de Bulnes primero que se construyera'l funicular en 2001, únicu mediu de tresporte p'aportar hasta ella. A día de güei, Bulnes ye l'únicu pueblu d'España que nun tien accesu rodáu.
La ruta consta de 4’6 kilómetros de llargor y 423 metros de desnivel. Dura alredor de 1 hora y 45 minutos en xubida y menos en baxada. La so dificultá ye moderada yá que los senderos son de piedra, estrechos y faen muncho zigzag. A pesar d'ello, el paisaxe ye impresionante: a midida que vas xubiendo puedes almirar el cañón de piedra pel que cuerre'l ríu Texu, montes, vistes panorámiques del macizu y ambiente tradicional montañés. Nun ye encamentada pa persones con vértigu. Forma parte del GR‑202 (Ruta de la Reconquista), con marques coloraes y blanques dende Poncebos.
Al rematar la ruta nel pueblu de Bulnes hai 2 opciones pa tornar: o bien volver sobre los tos propios pasos pel mesmu senderu pel que vinisti o baxar nel funicular que sal cada media hora.
Ascensión al Picu Urriellu
Una ruta complicada pero mui atractiva p'aquellos amantes del monte, de les más mítiques de Cabrales. L'altor máximu ye de 1953 metros, hai casi 900 metros de desnivel y el llargor del percorríu ida y vuelta, ye de pocu más de 12 kilómetros. El tiempu de duración aproximao ye de 6 hores.
La ruta empieza en Pandébano o Sostres, xubiendo pela Canal de La Celada o “Sur Directa”. Mientres la mayor parte del percorríu hai vistes directes al muriu del Urriellu y al macizu central; una redolada alpina espectacular y sensación de cume históricu. El tramu final puede riquir daqué d'escalada y esperiencia n'altu monte. A los pies del Urriellu atopa l'emblemáticu abellugu Delgado-Úbeda, consideráu como base habitual pa escaladores y alpinistes. Ufierta servicios completos.
Ruta a Peña Castil dende Pandébano
Una ruta de monte esixente pero inolvidable nos Picos d'Europa, l'ascensión a Peña Castil (2.444 m) dende Cabrales, en concreto dende la Collada de Pandébano ye un apueste seguru. Esti cume, menos conocíu que'l cercanu Urriellu, ufierta una de les meyores vistes panorámiques del macizu central.
El camín xube pela canal de les Moñes, ente pacionales, pedreres y antiguos ivernizos, hasta algamar la collada de Camburero. Dende ende, un últimu esfuerzu lleva hasta'l cumal, onde'l paisaxe compensa en demasía: Urriellu, Torrezarréu, Peña Vieya y un horizonte caliar espectacular.
Ye una ruta esixente (más de 1.400 m de desnivel), encamentada pa senderistes esperimentaos, bien preparáu y con bona forma física. En díes despeyaos, tamién ye posible esviase escontra la famosa cueva de xelu de Peña Castil. Ideal pa los que busquen una aventura alpina fuera de les rutes más transitaes.
Ruta del Quesu y la Sidra
Asitiada na aldega d'Asiegu, esta ruta combina naturaleza, cultura y gastronomía asturiana nuna esperiencia inolvidable. El percorríu, de baxa dificultá y aptu pa tolos públicos, trescurre con vistes al Picu Urriellu y dexa descubrir los paisaxes del valle del Cares.
Inclúi visites guiaes a una quesería artesanal, onde s'esplica'l procesu d'ellaboración del quesu Cabrales, y a una pumarada, onde s'amuesa cómo s'ellabora la sidra asturiano. La xornada remata con una tradicional espicha, una comida típica acompañada de sidra casero.
Con una duración d'ente 2 y 4 hores, esta actividá ye ideal pa families, pareyes o grupos que quieran conocer l'alma rural d'Asturies. Amás, foi ún de los motivos polos qu'Asiegu foi escoyíu Pueblu Exemplar d'Asturies.
