El sábadu 9 d'ochobre entama en Xixón el IV Rally Turísticu Ruta Vía de la Plata nel que participen mediu centenar de motocicletes de cilindrada mayor a 250 c.c. Mientres cuatro díes van percorrer la hestórica N-630 (y A-66) dende Xixón hasta Carmona nuna ruta 100% sobro asfaltu concebida pal esfrute de los participantes.
L'oxetivu principal d'esta prueba de calter turísticu nun escuerre atopar al motociclista más rápidu capaz de travesar la Ruta Vía de la Plata, sinón esfrutar unos díes de rodada en moto por una de les rutes más guapes del nuesu país, arrodiaos de xente coles mesmes ganes y pasión poles dos ruedes.
La prueba avanza a lo llargo de casi mil kilómetros y cuatro comunidaes autónomes, creando un itinerariu fabulosu, con delles ciudaes Patrimoniu de la Humanidá, míticos puertos de monte, innumberables manifestaciones artístiques y monumentales de primer orde, y una naturaleza cambiante que va dende los campos d'Andalucía hasta les elevaciones del Cordal Cantábricu, travesando les deveses y los montes de encinas y monte baxu estremeños, y pasando polos pictóricos horizontes del pandu castellanu.
En paralelu, van realizase incursiones a puntos d'interés y tramos que, a pesar d'abandonar temporalmente la N-630, van enguapecer les xornaes de conducción apurriendo un extra d'aventura a la yá de por sí fascinante Ruta Vía de la Plata. La prueba nun va tar exenta de sorpreses y visites a llugares estratégicamente asitiaos pa esfrutar del que promete ser un rally distintu. Van visitase asina, ente otres localidaes: Mieres, La Pola de Gordón, La Bañeza, Benavente, Guijuelo, L'Aldea del Cano y Los Santos de Maimona.
