Los bufones son fenómenos naturales que se formen por cuenta de la acción erosiva del mar y l'agua sobre la roca caliar. Esto anicia grietes y chimenees que conecten el mar cola superficie terrestre. Cuando'l folaxe ta sele, l'aire estruyíu nes galeríes espúlsense al esterior, pero en díes de fuerte folaxe, tantu l'aire como l'agua salen disparaos a gran presión, xenerando impresionantes chorros d'agua qu'algamen altores notables.
Ente los más destacaos n'Asturies tán los Bufones de Pría, asitiaos na localidá de Llames. Dende ellí, ye necesario dexar el coche y siguir a pie pa percorrer los espectaculares cantiles que s'estienden énte nós. En xornaes de mar brava, l'espectáculu ye estelante. Esti llugar ye realmente fascinante, y les vistes dende los cantiles xustifiquen por sí soles el viaxe. Si amás la marea ta alta, la esperiencia resulta indescribible. Esiste una ruta de los bufones, con entamu y final en Llames. Tien una dificultá baxa, una duración de cuatro hores, y ufierta la oportunidá d'esfrutar dafechu de la so singular guapura.
Agora, mientres l'iviernu, ye la meyor dómina p'averase a ver esta maravía natural de los Bufones de Pría, anque ye verdá que si hai temporal, vas poder velo ensin problema en cualquier dómina del añu. Eso sí, con precuru, nun vaya ser que la visita se vuelva traxedia. Intervienen diversos factores, destacando los más relevantes: una fuerte presencia de mar de fondu p'apreciar los bufones en tol so esplendor; cuanto mayor seya, meyor. Ye preferible allegar mientres la marea alta, anque nun resulta imprescindible si hai condiciones de temporal intensu. En cualesquier casu, toma siempres máximos precuros al caminar ente los bufones: evita asomate a les fisures o los cantiles cercanos.
