Los intérpretes seleccionaos van actuar na Gala Final del gallardón, el 13 de payares nel Teatru Fantasio de Navia

El xuráu del Premiu Camaretá al Meyor Cantarconvocáu pola Conseyería de Cultura, Política Llingüística y Turismu, fixo pública la selección de los cuatro cantares finalistes de la XII edición del gallardón: Rambalín, de Rodrigo Cuevas, La mesma revolución, de Silvia Quesada, Cantar pa durmir un ninin, de Mapi Quintana, y L’espeyu, de Slum Suit.

Estos cantares van intrerpretase na gala final del Premiu Camaretá, que va celebrase'l próximu 13 de payares nel Teatru Fantasio y tres la que va dase a conocer el tema vencedor.

El xuráu del premiu tuvo presidíu pol director xeneral de Política Llingüística, Antón García, y integráu polos músicos Alicia Álvarez Sanguino, Pablo Moro y Naomí Suárez, la periodista y escritora Aitana Castaño, y la filóloga y profesora Mercedes Ruisánchez.

Los miembros del xuráu tuvieron en cuenta a la hora de tomar el determín la calidá na composición y les interpretaciones vocal y instrumental, amás de la corrección llingüística de la lletra y l’usu de la llingua asturiana. El Premiu Camaretá ta dotáu con 6.000 euros.

El Premiu al Meyor Cantar pasó a denomase Premiu Camaretá al Meyor Cantar anguaño, n’homenaxe a la que foi la primer agrupación cultural y musical del Surdimientu. En 1975, empezaron a axuntase col nome de Camaretá un piñu de mozos con inquietúes musicales y lliteraries vinculando a la recuperación de les llibertaes, la creatividá y la llingua asturiana. D’aquella agrupación formaron parte, ente otros, Chus Pedro, Manolo Peñayos, Nel Xiblata, Manuel Asur, Xuan Marcos, Teresa Estrada o Aurora Roces.