Grau cautiva col so equilibriu ente tradición y naturaleza. La so villa capital, conocida pol animáu mercáu dominical, ye puerta d'entrada a verdes valles, ríos cristalinos y montes. Encruz históricu de rutes, como'l Camín de Santiago y el Camín Real de la Mesa, Grau ufierta un ricu patrimoniu de palacios, horros y arquitectura indiana. La hospitalidá de les sos xentes, la so gastronomía de productos frescos y fiestes populares converten esti enclave moscón nuna parada imprescindible p'afayar la esencia d'Asturies. Na to visita a esti conceyu asturianu, nun puedes perdete estos trés puntos:
Los mercaos de Grau
Lloñe del turismu de mases, les places y cais más céntriques de la villa son ocupaes cada miércoles y domingu por decenes de productores locales, comerciantes y artesanos. Vas poder atopar lo meyor de la zona: el famosu quesu Afuega’l Pitu, les fabes más tienres, miel, embutíos, frutes, verduras, amás de prendes, accesorios y artesanía. L'ambiente anímase entá más gracies a la hostelería y al variáu comerciu local, qu'abre tolos domingos pela mañana. Amás, a lo llargo del añu tienen tamién llugar distintos mercaos temáticos y mercadones, como'l Mercadón de Primavera, el Mercadón de Seronda, el Certame de la Escanda, el de la Faba o la Feria d'Artesanía de Santiago.
Ruta de les fortificaciones
La estratéxica situación del conceyu de Grau, que tanto favoreció'l comerciu a lo llargo de la hestoria, foi tamién la causante de la crudeza de los enfrentamientos bélicos que tuvieron llugar na zona. Mientres la guerra civil española, el pasiellu de Grau foi escenariu de grandes conflictos. Casi un sieglu dempués, entá caltenemos restos de fortificaciones, sobre manera al rodiu del Monte de los Pinos.
La mayor parte son visitables ya inclusive esiste una ruta pa poder llegar hasta elles. Les fortificaciones constitúyenles principalmente niales d'ametralladores, fortines y casamates, dalgunos de los cualos caltienen inscripciones con feches y nomes. Na so mayoría atópense señalizaes y tán acompañaes de paneles informativos pa conocer caúna fondamente.
Amás, nel Muséu Etnográficu ya d’Hestoria de Grau, esiste una colección de la guerra civil con pieces de l'asociación ARAMA y répliques del grupu Frente del Nalón. Esta colección ta na sede del muséu asitiada nel Polígonu de La Cardosa, llamada “Cultura tradicional ya colección de la guerra civil”.
Visitar el valle de Sama
El valle de Sama bien merez una visita. Nél atópase dispersu un importante núcleu de población, que xunto al paisaxe autóctonu representa unu de los llugares más atractivos del conceyu. Amás de la redolada idílica, en Sama pueden vese curiosos y variaos horros y paneres, arquitectura tradicional, casones y palacios como'l de Vallinas y La Mouta y hasta una escuela indiana. Ye'l Grupu Escolar María Josefa, güei sede del Muséu Etnográficu de Sama. Construyóse nos años 30, financiáu pol indianu Adolfo Prieto y destaca porque ta afatáu con un percuriosu conxuntu d'azulexos, únicos n'Asturies, nos que pueden vese escenes d'El Quixote, amás de dichos y refranes.
