Dende'l famosu Mirador del Fitu, puede empecipiase una guapa y bona ruta pola Sierra del Sueve hasta'l Picu Pienzu.
El Picu Pienzu ye'l cume más altu de la Sierra del Sueve, que s'estiende pelos conceyos de Piloña, Parres, Colunga, Caravia y Ribesella. Amás esta sierra considérase como l'últimu abelugu natural d'unos animales tan característicos de la fauna asturiana como son los asturcones.
Dende lo alto y con un día estenu pueden vese tanto unos doscientos kilómetros de la costa asturiana como los Picos d'Europa o la Serra do Aramo. El xeólogu Schultz, afirmaba que podía llegar a vese'l paisaxe dende Galiza hasta Bizkaia.
Partiendo como dicíamos enantes dende el Mirador del Fitu, va pasase por distintos montes de pinos por un marcáu senderu. Mientres el trayectu puede reparase la inmensidá del Mar Cantábricu o'l Picu Babú (nel qu'hai una cruz metálica que conmemora'l décimu aniversariu del Club d'Aire Llibre de la Universidá Llaboral). Tamién puede vese'l fayedal más importante del Sueve y que a menor altitú ta asitiáu de too Asturies, La Viescona o Viesca la Toya.
Yá no cimero, a unos 1.100 metros d'altitú atópase una gran cruz metálica de 16 metros de valumbu que sustitúi a otres anteriores de madera. Estes últimes, llevantaes por vecinos del pueblu de Llastres siguiendo promeses de marinos y emigrantes. Nel visu tamién hai una caseta y una antena de repetidor de radiu, alimentáu con plaques solares.
Un bon llugar pa facer una parada pa descansar o comer, ye la zona de Mergullines, a la sombra del picu. Tocante a la fauna del llugar, na zona más cercana al Picu Pienzu, pueden vese algunos caballos, asturcones y gamos. Tocantes a la fauna avícola, pueden vese águiles, utres, o alimoches, entre otros.
