Tres la Residencia creativa y técnica en Laboral-Ciudad de la Cultura, “Anatomía de una Habitación Propia” va estrenase nel mesmu Teatro de la Laboral el sábadu 27 de febreru a les 19:00.
“Anatomía de una Habitación Propia” ye un espectáculu unipersonal ya intimista de danza-teatru nel que testos biográficos escritos pola actuante (Estrella R.) enxareyense con otros de les Sinsombrero, esi grupu d'escritores, poetes, filósofes, artistes y axitadores culturales de la xeneración del 27 invisibilizaes pol fechu de ser muyeres. A la palabra hai que añedi-y partitures físiques de gran potencia y fraxilidá.
Con esti trabayu queremos da-yos voz y presencia d'una forma distinta a los habituales (que non comunes) homenaxes y reconocencies. La selección de testos ye de les autores Carmen Conde, Josefina Romu Aregui, Concha Méndez, Pilar de Valderrama, Elisabeth Mulder y Rosalía de Castro. La introducción ta estrayida/inspirada en “A room for one's own” (Un cuartu pa una mesma) de Virginia Woolf.
Partiendo del escenariu como rincón íntimu y complexu de la actriz-bailarina de los sos recovecos emocionales, abrense les puertes d'esa intimidá de par en par pa compartila col públicu, esi grupu de voyeurs que van ser cómplices y testigos del viaxe pol amor, el desamor, la maternidá o la pérdida y el sinfín de sensaciones que producen en cuerpu y mente d'una muyer.
La dirrección corre a cargu de Luis Vigil (Kamante Teatro) que lleva trés décades manexando con identidá propia el teatru d'oxetos, marca de la casa y con una marcada presencia en “Anatomía de una Habitación Propia". Al traviés d'esta disección del "dormitoriu-emocional" de la actuante, entretéxese un filu de vida pol que transitar nos distintos estaos d'ánimu. Otra baza importante nel viaxe ye la música orixinal compuesta ya interpretada por Jorge Arche, con una xoven María Muñoz cantándola.
