L’Anguleru, como asocede n'otros puntos del estáu español, ye la nuesa referencia navidiega, la persona qu'apurre los regalos a los más pequenos… y a los que yá nun son tanto.
L’Anguleru foi un personaxe creáu pola asociación cultural Garabuxada, de L’Arena (Sotu’l Barcu), en 2008 al envís de potenciar una Navidá más cercana a la tradición asturiana. Escoyóse'l personaxe d'un anguleru por ser esti oficiu unu de los más característicos de la localidá de L’Arena y por esa pesca de l'angula bien amestada a bona parte de la marina asturianu. Últimamente, ta en procesu d'afitamientu por ser una figura motivadora pal aprendizaxe de la llingua asturiana a les xeneraciones más nueves.
D'antiguo, mientres la pesca n'iviernu de l'angula, munchos anguleros emplegaben el sobresueldu de les ganancies pa mercar regalos a los neños. Sicasí, n'Asturies yá esistía constancia de personaxes navidiegos que se dedicaben a repartir regalos, especialmente nes mazcaraes d'iviernu.
Esti próximu sábadu 24 d'avientu, como tolos años, va salir a desfilar peles cais de L'Arena, onde los neños van poder ve-y y, dempués, va llegar a toles cases a dexar los regalos a los neños y neñes asturianes.
