Sí, ye ablucante, pero como puedes ller nel titular, los Reis Magos tan representaos nun escudu d’armes d’una de les families del conceyu d’Ibias. Trátase del escudu de la familia de los Pena, y puede vese na Casa del Salón nel pueblu de Marentes.
Nesti edificiu, una casa de calter popular con capilla na que se veneraba a San Roque y San Francisco de Sales, podemos alcontrar na fachada un escudu formáu por dos pieces, con la fecha de 1663 nel timbre y que flanquea un yelmu col rostru asomando pela ventana y el brazu blandiendo una espada. El campu, cortáu y ovaláu, ta dispuestu sobre una tabla qu’imita a cueru recortao y enrollao y va flanqueáu por dos lletreros separaos por cordones sobre cabeces d’ánxeles alaos, nos que se puede lleer REYES MAGOS. Nel centru del escudu, apaez una breve representación de l’adoración de los Reis Magos, nel qu’apaez el Neñu Xesús suxetando una bola del mundu y flanqueáu por dos reis que lleven una estrella sobre la cabeza. Na punta del escudu, apaez la inscripción ARMAS DE PENA.
Hai dalgunes lleendes al rodiu d’esta hestoria que vinculen a un miembru de la familia como descendiente directu d’unu de los Reis Magos, anque tratadistes modernos cunten la versión más venceyada a la realidá, con un apellíu d’orixe castellanu, del valle de Mena, en Burgos. Lo que si que ta claro ye que la apaición d’estos famosos personaxes ye dalgo bien curiosu.
