El 23 de xunu llega una de les nueches más especiales del añu y son munches les propuestes d'ociu y esfrute qu'hai en toa Asturies. Por eso, güei traémoste trés fiestes onde poder celebrar la nueche de San Xuan.
La Foguera L’Entregu
Otru añu más, la fiesta de San Xuan en L’Entregu ye una de les más esperaes. Como novedá, nesta edición xuniéronse'l Centru Social Autoxestionáu La Semiente cola Asociación Cultural L’Osu Xabaz pa entamar la quema a partir de les 00:00.
La xornada va empezar con L’Escurecer en danza, con baille tradicional dende les 20:30 hores n'escenariu abiertu y con inscripción previa si quies tocar. Darréu, va ser el tiempu de los conciertos. Dende les 22:40 hores, Ilustres Patilludos y La Tarrancha amenizarán la nueche más especial del añu na cuenca del Nalón. A lo último, a partir de les 1:30 hores, va ser el tiempu de Allanai Sound System, que va poner el ramu a una nueche más de fueu y rituales.
San Xuan en Mieres
Una de les principales fiestes del branu nel conceyu de Mieres ye, ensin dulda, San Xuan. Tres l'ésitu del pasáu añu con M-Clan, anguaño ye la vez de La Cabra Mecánica na nueche de la foguera, a partir de les 01:30 hores. Too eso xuniráse a los conciertos que tán programaos del 16 al 25 de xunu.
La Foguera de Caravia
A lo último, otra de les nueches de San Xuan más conocíes en Asturies ye la de Caravia. Amás de la tradicional foguera, anguaño en Caravia va haber delles actuaciones. A partir de les 22:30 hores va ser la vez de Poetas de Botella. Tres l'encendíu del fueu y los fueos artificiales a les 0:00, solo media hora dempués va ser el momentu de Dixebra, que van preceder a Me Fritos and the Gimme Cheetos, a partir de les 2:00 hores. Darréu, hasta'l zarru, va haber música na carpa de la organización.
