L’Amuravela ye un sermón laicu, una tradición mediu relixosa y mediu profana heredada de xeneración en xeneración como demostración de la especial devoción que'l pueblu pixuetu siente pol so Patrón San Pedro y que consta de dos partes, el relatu al Santu y la maniobra de saludu.

L’Amuravela ye de les costumes más antigües de Cuideiru y celébrase na Ribera al pie de la plaza del Sable, en plenu centru del cascu antiguu del pueblu. y celebra mientres les fiestes patronales de Cuideiru, tolos años el día de San Pedro, el 29 de xunu.

Nun se sabe esactamente cuándo foi l'empiezu d'esta tradición. Según diversos comentarios y estudios, podría datar de fai más de 400 años (alredor de 1569), dómina en que tuvo llugar la construcción de la Ilesia. Mientres esa dómina volvieren los marineros qu'acompañaron a D. Alvaro Menéndez na Conquista de la Florida, embarcaos nuna nave construyida en Cuideiru, “L'Espíritu Santu”. Mientres ese viaxe aprendieron el saludu que se facía al Almirante y quixeron facer lo mesmo col so Santu Patronu.

Podemos dicir que L’Amuravela, que los sos oríxenes como vimos piérdense na hestoria de Cuideiru, ye una crónica en versu de los acontecimientos de la villa pixueta y del mundu, enllena de gracia ya ironía. En 1946 recuperóse esta gran tradición: l'Alcalde de Cuideiru D. Luis Antolín y D. Luis Tejerina llegaron a un alcuerdu col cura d'entós, D. Juan Méndez, por que se recitara L’Amuravela ensin la presencia de San Pedro.

Una de les persones que más fixo por que esta tradición se caltuviera foi Elvira Bravo, autora del Sermón dende 1947 hasta la so muerte en 1986. Otra de les persones destacaes nel llabor de recuperación y caltenimientu de L’Amuravela foi Juan Luis Alvarez Bravo “Totó” (fíu d'Elvira Bravo), recitador mientres 32 años. Nel añu 1983, “Totó” tomó la decisión de dexar L’Amuravela. Diversos acontecimientos obligáronlo a siguir hasta 1984, pero yá buscando un sustitutu.

Al añu siguiente, 1985, Cesáreo Marqués Valle toma'l relevu y dende entós ye l'actual recitador de L’Amuravela. Dende l'añu 1995, tamién ye'l so autor. Gracies al so amor a Cuideiru, esta ancestral tradición nun se perdió y nel so ánimu ta caltenela y promocionala tolo que se merez.