Los sidros y comedies de Valdesoto vuelven anguaño 2024 a Valdesoto pa siguir espublizando la cultura tradicional asturiana. Va ser el 7 de xineru, nel llugar habitual de celebración, esto ye, el Campu la Ilesia, y va ser a partir de les 12:30 hores, en rematando la misa, cuando empiecen Les comedies. Anguaño, van ser trés:
- Pastos de paz, representada polos Escolinos de Faes y fecha por Manuel Pergentino Martínez Argüelles.
- Valdesoto ye real, representada pola Xuventú de l’Asociación El Cencerru y fecha por Fani Moro Montequín.
- ¿De qué facemos la comedia?, representada pola Asociación el Cencerru y fecha por José Ramón Oliva.
Amás, los sidros, como ye tradición, van pidir l'aguilandu por dellos pueblos de la parroquia sierense.
La hestoria de los Sidros y comedies
La hestoria y orixe de los sidros y comedies ye bien chocante. El personaxe del sidru procedería, según la teoría del historiador Juan Uría Ríu, de los ritos de los pueblos primitivos, «onde los miembros de la cla buscaben bien la protección del animal totémicu, amarutándose coles sos pieles, o la fecundidá de les persones».
El nome de guirriu ye más xeneral nel restu d’Asturies como, por casu, en Ponga, pero en Siero y Bimenes conózselos por sidros. Sobre la procedencia del nome hai delles teoríes: según Constantino Cabal, la palabra guirriu procede del llatín GUERRIRE ‘saltar de gozu, retozar’, en clara referencia a una de les sos funciones.
Sicasí, pa Fausto Vigil procede del euskera OGUERRIA, que significa ‘Navidá’. El mesmu Fausto Vigil considera que los sidros (entendiendo por talos el conxuntu formáu polos sidros y la comedia) son l'últimu esllabón de los autos sacramentales que se representaben nes ilesies y, dempués, fuera d'elles. Juan Uría camienta que’l so orixe ta nes celebraciones de los pueblos primitivos. Según otra consideración, y mitolóxicamente falando, el guirriu sedría la reencarnación de los vieyos mitos griegos y romanos del Silván, del Faunu y del Busgosu, escorriendo a les muyeres pa dexales embarazaes.
Les dómines de les comedies
Dientro de la tradición de les Comedies, tenemos d’estremar delles dómines:
La primera, con un entamu desconocíu, y que llega hasta cuasi’l final del sieglu XIX. Nella representen obres d’autores anónimos, de calter popular y tradicional, y tresmitíes oralmente de padres a fíos y de xeneración en xeneración.
La segunda dómina trescurre dende finales del sieglu XIX hasta 1936, onde se representen obres d’autor, principalmente de José Noval “Siero”, con unos personaxes que pueden considerase fixos y unes representaciones con plantegamientos similares. La llegada de la Guerra Civil y la posterior prohibición del antroxu fueron les culpables de la desapaición d’estes manifestaciones culturales.
La tercer dómina, qu’empieza a mediaos de los años cincuenta del sieglu pasáu y llega hasta 1991, caracterízase polos intentos de distintos autores como Luis Rodríguez “Asaura” o Nieves Noval pa recuperar estes representaciones, pero siempres con un ésitu relativu porque s’estendíen en curtios espacios de tiempu. Más alantre, un grupu de mozos de La Rasa propunxeron recuperala otra vegada y pa ello cuntaron cola collaboración inestimable de “Asaura”, que fuera a lo llargo de los años el nexu d’unión pa que nun se perdiera dafechu la tradición.
La cuarta y última domina foi la de la recuperación total, que se fixo nel añu 2005 en Valdesoto y que se caltién hasta güei.
La comedia
La Comedia taba integrada por actores varones, que representaben a distintos personaxes acompañaos polos sidros, de los que tomen el nome. Nun solía haber más d’una en cada parroquia y los domingos de finales y principios d’añu diben pelos pueblos vecinos, procurando nun coincidir dos grupos nel mesmu pueblu.
Paez que los sidros de más sonadía en Siero yeren los d’Areñes y La Rasa (Carbayín) y Valdesoto. Tenemos noticies de que tamién hubo sidros en Bimenes y grupos de guirrios en Llangréu y Samartín del Rei Aurelio (L’Agueria, Sotrondio) que, de la mesma forma, percorreríen los pueblos y parroquies de la redolada y de los conceyos vecinos.
Estes comedies nun teníen escenariu fixu; cualesquier llugar onde hubiera espectadores sirvía. Yera frecuente’l representales nel campu de la ilesia, a la salida de misa, o delantre de los chigres que pagaben la comedia.
Les representaciones duraben alredor de media hora y constaben d’un actu únicu: caúna de les entraes y salíes de los personaxes marcaba les socesives escenes. Nes intervenciones malapenes hai diálogu, sinón que lo qu’atopamos son más bien monólogos, qu’enllacen colo anterior y lo posterior per aciu d’entrugues y respuestes.
Al rematar la representación, los comediantes recoyíen el dineru que-yos daba’l públicu y col qu’entamaben una bona cena pa toos. En Siero, les representaciones llegaben hasta’l día de Reis, nel que toles comedies de la zona allegaben a Valdesoto, onde tres d’un concursu ente los sidros pa ver quién saltaba más alto, comenzaba la representación de la comedia del sidru que ganara’l saltu.
