Un añu más volverán a celebrase les Mazcares d'Iviernu de Valdesoto, y traen consigo una programación digna de valorar. Estes xornaes son una de les manifestaciones culturales más antigües d'Asturies.
Nesta costume, persones enmazcaraes recorren les cais de Valdesoto y La Pola Siero con traxes llamativos fechos a mano. L'orixe ta venceyáu con antiguos rituales paganos y col tiempu ganaron la influencia carnavalesca.
El martes 11 de marzu tuvo llugar la presentación d'estes xornaes na Casa'l Conceyu de Siero. Foi un actu enllenu d'emoción y de ganes pa los llocales.
Les celebraciones van tener llugar el 29 y 30 marzu. Van participar grupos non solo asturianos, tamién van visitanos collacios de Llión, Ourense, Álava, Caceres y Guadalajara. Estímase que van participar 200 persones d'ente 7 y 75 años. Esto recalca la importancia a nivel nacional d'esta tradición asturiana.
La programación va entamar la mañana del sabadu, a les 11:00, con un taller infantil de Mazcares. Tamién va contase con una esposición fotográfica sobre la costume de la mano de Mercedes Vázquez. A les 17:00 van siguir les celebraciones col desfile peles cais de Valdesoto, nel que se va esfrutar de mázcares y traxes tradicionales.
A les 12:00 del domingu va llevase a cabo un segundu desfile, esta vegada peles cais de La Pola Siero. Son dos pasacais pa esfrutar en familia y comunidá de l'allegría de les costumes rexonales.
Les xornaes de Mazcares d'Iviernu son gran ocasión pa compartir esta esperiencia y esfrutar en Valdesoto de forma única. Amás del ambiente festivu, ye tamién un momentu d'intercambiu cultural y compromisu cola identidá llocal. Ye una celebración divertida ideal pa pasar un fin de selmana familiar enllenu de tradición asturiana.
