“Asturies, paraísu natural”. Ye dende 1985 l'eslogan col qu'Asturies se viende al mundu. Equí tenemos innumberables siendes y rutes de monte, más de 200 sableres, 7 Reserves de la Biosfera, 5 Parques Naturales… Son munches les posibles escapaes, pero güei en Ver Asturies encamentamoste'l Parque Natural de Les Ubiñes – La Mesa, un espaciu que dende 2012 ye Reserva de La Biosfera.

Esti paraísu natural, un de los tantos que podemos atopar n'Asturies, asitiase nel sector meridional d'Asturies, partiendo con Llión, estiéndese pelos conceyos de L.lena, Quirós y Teberga.

El Parque Natural de Les Ubiñes – La Mesa tien una estensión de más de 45.000 hectárees, en concretu, esta Reserva de la Biosfera ocupa'l 4,3% de la superficie d'Asturies.

En tol parque estremamos un fuerte contraste de relieves, y ye que nel Parque de Les Ubiñes – La Mesa atopamos, por casu, el Macizu de Ubiña, el so máximu altor son los 2.417 metros, la mayor altitú de tol Cordal Cantábricu fuera de los Picos d'Europa. Podemos esfrutar de les vistes de la reserva dende los puertos de Payares, La Cubilla, La Cobertoria, Ventana o San Llorienzo.

Dientro del espaciu que conforma'l Parque Natural de Les Ubiñes – La Mesa podemos esfrutar de museos, como l'etnográficu de Quirós o'l Parque de la Prehistoria de San Salvador. Y non namás museos, tamién nesti espaciu atopamos 77 xacimientos arqueolóxicos, ente los que destaquen los xacimientos venceyaos a la Vía Carisa. 

Amás, podemos esfrutar de los sos 66 rutes, ente les que s'atopa la Sienda del Osu. Y falando d'osos, nel Parque Natural de Les Ubiñes – La Mesa ye un de los pocos sitios onde inda se puede esfrutar del osu pardu, pero non namás l'osu pardu, tamién otres especies, tamién en peligru d'estinción, como'l urugallos. Nel parque tamién tán presentes llobos, corzos, xabalinos, foinos, martalenes, llondres, armiños o gatos monteses… Families d'esperteyos habiten nun Monumentu Natural qu'atopamos dientro del parque, como ye'l de la Cueva Güerta. 

Y amás de la so abondosa fauna, si falamos de flora once de los diecinueve series de vexetación que pueblen Asturies tán representaes nel Parque Natural de Les Ubiñes – La Mesa. Destaquen los fayedales de Valgrande o los rodales de Xardón del puertu de Agüeria…

Nel Parque Natural de Les Ubiñes celébrase añalmente la fiesta gastronómica de la Fiesta del Corderu, que'l primer domingu de xunetu de cada añu, nel Prau L.lagüezos, sirve d'unión ente los vecinos de dos de los trés conceyos que formen esti parque… Esta fiesta ta declarada d'Interés Turísticu Nacional, y nella podemos tastiar el típicu Corderu a la estaca. Si visitamos el parque na so redolada vamos atopar numberosos pueblos, onde amás de la so arquitectura podemos esfrutar de la gastronomía de la zona.

Son munches les razones pa pasate a facer una visita a esti “pequenu” paraísu natural, pero una más, los habitantes de la zona van recibite colos brazos abiertos, y ye que la hospitalidá de los mesmos ye otra de les referencies del parque.

Y recuerda, siempres que visites cualquier espaciu natural, como diz el Decálogu de les Bones Práctiques de Turismu Asturies "realiza un turismu responsable col mediu ambiente, respetuosu coles especies animal y vexetal y cola redolada. Reparalos en llibertá o siguiendo los sos rastros, pero ensin dexar buelga del to pasu”.