L’asturianu Alfonso Zapico, Premiu Nacional de Cómic en 2012 por «Dublinés» (homenaxe a James Joyce), Zapico ye unu de los grandes referentes del cómic español, creador ente otres de la monumental «La balada del norte», un exerciciu de memoria colectiva, novela gráfica que recupera un momentu clave de la hestoria d’España, la Revolución del 34, que celebra nesti añu 2024 el so noventa aniversariu. Nesi sen, el conceyu d’Avilés, echando un chisgu al títulu de la obra, acueye dende febreru d’esti añu la esposición «Les balaes de Zapico» na Sala Permanente de Cómic d’Avilés.
Amás, el mesmu Zapico compunxo’l cartelu de la esposición, basáu na unión d’una de les protagonistes en «La balada del norte» y un icónicu espaciu d’Avilés como les naves de Balsera. El dibuxante recordó los doce años trescurríos dende la so última amuesa n’Avilés, «onde siempres faigo les esposiciones guapes». Nesti casu, «lo que puede vese ye un poco como si yo abriera la puerta del mio estudiu a una montonera xente, pero traxi l’estudiu a Avilés y punxi les páxines orixinales, traxi un popurrí d’ilustraciones, d’acuareles… coses que la davezu xente nun ve».
Esta amuesa cunta cola esclusiva de poder ver llámines del so nuevu trabayu, nel que ta somorguiáu agora mesmo Zapico, tamién rellacionáu cola recuperación de la memoria como «La balada del norte». En pallabres del autor, «va ser un llibru, qu’espero nun tardar más de dos años en terminar, y que tien continuidá y conexón con «La balada del norte» porque fala d’Asturies, de la hestoria recién, del esiliu y de la xente anónimo a la que la hestoria escaez. Y esti espaciu ye un luxu pa poder rescatar a esa xente del olvidu y enseñalo a la población d’Avilés y al públicu que venga».
Xunto a ello, un repás a la trayectoria artística de Zapico, con trabayos orixinales d’obres que marcaron el camín del autor, como «Dublinés» o «Los puentes de Moscú», ente otros. Ta siendo tan grande l’ésitu y afluyencia de públicu que’l periodu d’esposición yá s’aumentó en delles vegaes, pero entá hai una postrer oportunidá de visitala, yá que la última ampliación de feches va permitir echar un güeyu a les llámines hasta xineru del 2025.
La balada del norte, protagonista
Y como nun podía ser d’otra manera, ye «La balada del norte» la protagonista especial nesta esposición, una novela gráfica que nos tresllada al añu 1933 en Madrid. Ellí, Tristán Valdivia, periodista ensin periódicu, editor ensin ésitu y amigu ensin ilusión, abandona la capital pa volver al norte. Ellí espéralu’l so padre, el marqués de Montecorvo. Son tiempos difíciles pal país, somorguiáu nes convulsiones de la segunda República, y el vieyu aristócrata tien de caltenese a la cabeza del so feudu particular: la Compañía Minera del Noroeste. Del negror de los valles mineros d’Asturies surden personaxes lluminosos, y sol ruiu atronador de les mines de carbón escúchase’l xuxuriu d’un cantar antiguu. Los vieyos y nuevos tiempos topeten brutalmente poniendo a prueba al protagonista, llueu a la humanidá entero. Ésti ye’l soníu de «La balada del norte».
Sicasí, eso ye namás que’l primer tomu d’una hestoria qu’algama cuatro publicaciones. Yá nel segundu tomu, la hestoria asocede nel Uviéu de la revolución, xusto cuando españa la llucha ente los obreros y l’estáu burgués. Tristán Valdivia, que volviera malu dende Madrid a la casa paterna, busca abellugu na capital, mientres los sublevaos avancen arrasando too al so pasu. La ciudá permanez en silenciu, hasta que de sópitu s’oi un ruiu a lo lloñe. Ye la dinamita de los mineros…
L’enfrentamientu ta sirvíu. Nos tomos trés y cuatro, col fracasu de la revolución d’ochobre na memoria, los protagonistes carecen la represión del estáu con Franco dirixendo dende Madrid, mesmo que l’esiliu y probitá de los asturianos cola guerra de 1936.
«Les balaes de Zapico» ye un viaxe a la memoria colectiva asturiana y gracies al conceyu d’Avilés, podemos afondar nella na Sala Permanente del Cómic d’Avilés hasta xineru de 2025, nuna ocasión única de ver pieces orixinales del narrador gráficu de la hestoria más recién d’Asturies. Una ocasión que nun pue desperdiciase.
