Cine Maxi
Dende entamu del sieglu XX constatábase un asentamientu de les industries modernes del ociu y hacia 1908 son habituales los cinematógrafos. En Llaviana funcionaron el Teatru Colón, Videal y el Cine de Matilde. L’edificiu del Maxi proyectóse en 1941 pol destacáu arquitectu Juan Manuel del Busto, ya inauguróse en 1943 como sala de cine y de fiestes.
Casa Conceyu vieya
Llaviana algama’l rangu de puebla a finales del sieglu XIII y nos sieglos siguientes La Pola desarróllase al rodiu de dos exes: la cai’l Sol y la cai la Mora. Esti edificiu data del sieglu XVII y, anque se remocicó, conserva l’escudu de los León d’Entrialgo. Afáyase na Plaza la Encarnación, enantes Plaza la Bolera, lo que denota’l so papel como llugar de conceyu.
Casa Conceyu
La estructura urbana asentábase alredor de les exes de la cai d’Arriba y la cai d’Abaxo. El Conceyu Llaviana llogró’l títulu d’Excelentísimu concedíu por Alfonsu XI el 27 de setiembre de 1903, resaltándose la so antigüedá, yá que foi reconocida como villa na dómina del rei Xuan II. Ente mediaos del sieglu XIX y entamu del XX el conceyu duplicare la población (d’unos 5.000 a unos 11.500), y la villa presentaba elementos decididamente urbanos: casinu, bancos, hotel y restorán, comercios…
Ilesia de Santa María l’Asunción
En 1889 l’Obispu Martínez Vigil constata col párrocu la insuficiencia del templu del Otero p’allugar a una población n’aumentu, y el 15 d’agostu de 1895 ponse la piedra primera del nuevu. En 1921 entámase una reforma dempués de qu’un rayu baltare la torre.
Escueles Graduaes
A mediaos del sieglu XIX yeren contaos los escolares esistentes nel conceyu. A finales d’aquella centuria, al contrariu, la mayor parte de la población infantil taba escolarizao. En 1896 había trece escueles públiques, llevando les deficiencies a que s’establecieren seis centros educativos particulares. Funcionaba tamién en La Pola una escuela nocherniega d’obreros católicos.
La Plaza la Pontona
Nel marcu d’una agricultura de subsistencia, el comerciu n’Asturies llindábase práuticamente a los intercambios ocasionales en feries y mercaos. En Llaviana celebrábase un mercáu selmanal los xueves. Les feries, de mano estacionales, pasen a ser continues col desarrollu de la ganadería intensivo. En Llaviana éstes teníen llugar a entamu d’ochobre y teníense por unes de les más importantes d’Asturies, y el ganáu llavianés emponderábase fuera tamién. En 1935 suspendíense les feries y concursu de ganáu, retomándose la so celebración en 1962 y siendo na actualidá una de les cites ganaderes y festives de mayor raigañu nel conceyu.
Santuariu de la Nuesa Señora del Otero
Llevantada posiblemente nel sieglu XVI, foi la ilesia parroquial hasta la construcción de la nueva, siendo oxetu dende entós d’unes remodelaciones grandes que cambiaríen radicalmente la so fisionomía, reduciéndose de mou considerable la so volumetría. Destaquen el retablu mayor del sieglu XVIII, la talla de la Nuesa Señora del Otero o la imaxe del Arcánxel San Miguel. Anque na actualidá ye un templu de planta centralizada en forma de cruz griega, n’orixe tratábase d’una edificación de cruz llatina.
