Muncho s’escribió yá sobre El Molinón, terrenu local del Real Sporting de Xixón, sede mundialista en 1982 y en prácticu empate col Carlos Tartiere d’Uviéu pol títulu d’estadiu mayor de Asturies, yá que s’asitien dambos alredor d’una capacidá de 30.000 espectadores. El so nome completu ye Estadiu Municipal El Molinón – Enrique Castro Quini, en memoria del llexendariu ariete y directivu del club rayáu, asina como del Fútbol Club Barcelona o la selección española.
La primer vegada que se xugó al fútbol sobre’l so verde foi en 1908, según rexistros na prensa del momentu, pero créese que pueda ser anterior. Esto convierte al estadiu xixonés nel terrenu de xuegu más antiguu del estáu y al binomiu Sporting-Molinón nel más estable del fútbol, yá que nun ye frecuente qu’un mesmu equipu xuegue tantos años nel mesmu campu nin que l’estadiu seya tan vieyu. El Sporting de Xixón fundóse en 1905, namás trés años enantes.
El Molinón, como centru del fútbol asturianu, casa del Sporting y mayor recintu de Xixón, vivió na so casi centenaria historia munches nueches d’allegría, murnia, llocura y reblaneda. Repasamos de siguío dalgunos de los momentos más icónicos.
El Molinón, un estadiu de película
Ún de los finxos más recordaos cuando pensamos na relación ente’l fútbol y el cine español construyóse n’El Molinón. Cuando José Luis Garci escribe y dirixe Volver empezar, estrenada en 1982, centra la historia nel regresu d’un escritor exiliáu a Xixón tres de cuarenta años de dictadura franquista. Antonio Albajara, interpretáu por Antonio Ferrandis, vuelve a la so ciudá natal pa celebrar el so premiu Nobel y realcontrase colos sos dos vieyos amores: Elena y el Sporting de Xixón.
Albajara foi xugador na so mocedá del Sporting, convirtiendo al club y a El Molinón nun leitmotiv recurrente na película. Al entamu, visita l’estadiu vacíu, dexando ver al espectador les obres de reforma que se realizaron por cuenta de la Copa del Mundu de 1982; dempués, conversa en Mareo con dellos excompañeros y, más cerca del final, Garci dedica dellos minutos de metraxe a un partíu de fútbol real, ente’l Sporting de Xixón y l’Atléticu de Madrid el 29 de marzu de 1981, y que terminó con victoria llocal por 3 a 2, cuando’l Sporting taba somorguiáu na so dómina dorada (dos subcampeonatos coperos y otru segundu puestu en lliga). La película ensambla les imáxenes reales del alcuentru cola visita de Albajara al estadiu y al propiu partíu.
Dempués de ganar el Oscar a Meyor Película Internacional, Garci presentó la estatuina n’El Molinón, dexando al conxuntu xixonés fotografiase col premiu.
Asina, asina, asina gana’l Madrid
Ún de los cánticos más sonaos del fútbol español y, per otra parte, ambivalentes. Pa los aficionaos del conxuntu merengue, supón una forma de celebración, que se canta cuando’l Real Madrid ta xugando bien, apoderando o cerca de consiguir una nueva victoria. Sicasí, nel restu d’estadios d’España, esti cánticu recupera’l so significáu orixinal y emplégase p’acusar a esti equipu de mala praxis o de corrupción arbitral, inclusive anque nun vaiga ganando. Ye por tanto, ún de los más frecuentes nos estadios más grandes d’España, tanto pola enorme rivalidá qu’esiste ente casi tolos clubes del país y el Real Madrid como pol so señaláu y mediáticu historial de discutinios arbitrales.
Foi una d’elles, n’El Molinón, la qu’empecipió esti cánticu. En 1979, nos primeros minutos d’un Sporting de Xixón-Real Madrid, el delanteru arxentín Enzo Ferrero foi espulsáu tres una agresiva patada de Isidoro San José, defensor blancu. El futbolistaprotestó airáu y, en respuesta, recibió una tarxeta colorada. El partíu terminó 1 a 1, empate insustancial y poco pa dambos equipos, punteros nesa temporada liguera, pero sentó les bases d’un cánticu que sigue cada selmana a los xugadores del Real Madrid, con significáu opuestu cada domingu.
Ha señalase qu’esiste ente dambos conxuntos una considerable rivalidá, sobre manera dende Xixón a la capital que na dirección contraria. Esto debe a dos factores principales: la dómina dorada del equipu xixonés coincide col dominiu blancu n’España, lo que provocó los trés subcampeonatos roxiblancos en cinco años y delles lleendes del Sporting tuvieron tamién nel Fútbol Club Barcelona, como Quini, Abelardo, Luis Enrique o David Villa, rival acérrimu del conxuntu merengue.
La música tamién xuega en casa
Anque Uviéu pue presumir d’allugar los conciertos de Michael Jackson, Deep Purple o Elton John, amás d’ún de los últimos conciertos de Camarón de la Isla, Xixón y el so queríu estadiu nun queden atrás tocantes a grandes nomes: Bruce Springsteen repitió en delles ocasiones y décades diferentes, cantando equí per última vegada nel 2013 nel que foi’l so únicu conciertu n’España de la so xira; Tina Turner y Dire Straits cantaron nel estadiu a principios de los años 90, y Paul McCartney abrió la so xira del 2004 n’El Molinón.
