La Estaya de la Llingua de la conceyalía de Cultura d’Avilés entama otra vegada más el ciclu d’actividaes n’asturianu pa neños y neñes La Reciella de la Factoría. Vuelve con tres propuestes escéniques online, la primera, pasáu mañana, vienres 30 de ochobre, cola obra de teatru familiar «Les madreñes vacíes», de Carlos Alba, a les 19.00 hores.
La decisión d’ufriles sólo de forma telemática tomóse por culpa de les normes de seguranza y proteición sanitaria escontra’l COVID-19, qu’amenorguen l’aforu del Espaciu Escénicu de la Factoría hasta dexalu sólo en 20 persones.
Esbilláronse tres espectáculos del mundu artísticu asturianu de renome, que yá tuvieron otres veces nel ciclu la Reciella, y que nesti casu ye la primer vez que graben les sos actuaciones nel mesmu espaciu escénicu de la Factoría. El públicu va poder disfrutar de les sos actuaciones dende cualesquier dispositivu electrónicu, como yá se fizo con ésitu nel confinamientu coles actividaes de la Reciella en Casa.
Carlos Alba guiará a los más pequeños de la casa en un viaxe llargu por oriente, con so espectáculo teatral y de marionetes, «Les madreñes vacíes». Programado pa el pasáu marz, y que tuvo que aplazarse al declararse el estáu de alarma. Al final, será pasáu mañana, vienres 30 de ochobre, a les 19.00 hores.
La cuentacuentos Ana Morán tomará el relevo el vienres 20 de payares, y llevará a les cases sos «Cachivaches», colos que hará revolotear la inventiva, tamién dende les 19.00 hores.
Y tamién un percorríu por diferentes países y cultures ye lo que propone la compañía Higiénico Papel Teatru con «El viaxe de Covaletti», el vienres 11 de payares a les 19.00 hores. Un espectáculo que tamién tuvo que suspenderse el pasáu 3 de abril.
Toes estes actividaes familiares podrán siguise al traviés de la páxina web de la Estaya de la Llingua d’Avilés, www.llinguaviles.com; la del Conceyu, www.aviles.es, asina como nes redes sociales municipales, y na plataforma asturiana de streaming Playpresta, www.playpresta.com.
Programa
• 30 de ochobre, 19.00 hores. «Les madreñes vacíes», de Carlos Alba. Teatru familiar.
• 20 de payares, 19.00 hores. «Cachivaches», de Ana Morán. Cuentacuentos.
• 11 de avientu, 19.00 hores. «El viaxe de Covaletti», de Higiénico Papel. Teatru familiar.
