La Università di Siena analiza textos en asturianu y so traducción y afirma: «Si nun se toman medíes se condenará a la extición»

Un trabayu de la Università per Stranieri di Siena firmáu por Barbara Biagioli, embaxo la tutorización de les profesores Beatrice Garzelli y Cèlia Nadal Pasqual, dedica’l so llabor investigador al asturianu, embaxo’l títulu Il caso dell’asturiano: lingua o dialetto? Analisi linguistica e traduzione di testi settoriali e letterariEl trabayu analiza l’idioma fixando l’atención nos elementos que lleguen a definilu como talu, ufriendo una contestualización territorial, política y ente’l restu de les llingües d’España. El trabayu pon el güeyu sobre la necesidá de protección del asturianu y los problemes que vive pa la so supervivencia.

El segundu y tercer capítulu del trabayu analicen la llingua asturiana en dos ámbitos bien distintos, pero complementarios, esto ye, al traviés del llinguaxe periodísticu y lliterariu, al traviés de delles traducciones de testos fechos pola propia autora, dellos periodísticos y un rellatu de lliteratura contemporanea, escritu por Inaciu Galán y tituláu Cartes nel hórreu (2019), de los qu’analiza’l procesu de traducción al italianu, faciendo analís xeneral del llinguaxe periodísticu mirando pa les traces principales del llinguaxe sectorial.

El trabayu ufierta tamién una panorámica de la lliteraria asturiana dende la dómina medieval hasta los nuesos díes, lo que confirma la presencia del asturianu, dende va sieglos, tamién na lliteratura escrita.

En lo que concierne a la traducción del texto de Inaciu Galán la autora ha destacáu nel trabayu que foi una traducción con presencia de un fuerte componente cultural, tanto nos temes trataos como nel léxicu y nes estructures sintáctiques utilizaes. Así ye que en esti rellatu ye recurrente la ambientación rural que dende siempre ha caracterizáu la lliteratura asturiana, reflejando el paisaxe d’Asturies y añadiendo material cultural a les composiciones. Precisamente por esta peculiaridá, explica la autora «hai una presencia elevada de términos típicamente asturianos intraducibles, que se denominan realia, la mayor dificultad encontrada al traducir foi la trasposición de sentíu dende la cultura de orixe hasta la cultura de destino».

Barbara Biagioli, la autora del trabayu, estuvo de Erasmus n’Asturies, exactamente n’Uviéu, «He vivíu ellí durante seis meses y me di cuenta de la importancia que tien la llingua asturiana, y consecuentemente so cultura, pa la mayoría de la población. Anque la utilización ente los jóvenes esté disminuyendo, sigue siendo sólida la identificación de les persones na cultura y na llingua asturiana», explica. «Diferentes factores me han lleváu a entender y percibir esti sentimientu común, porque na cai, mui a menudo, veía carteles en castellano que embaxo tenían la traducción al asturianu; muncha gente nel mesmu momentu en que he conocíu, incluso mis compañeros de la Universidá, sabían hablar perfectamente en asturianu y he notáu la presencia de cursos de asturianu dientro del gráu en Llingua y Lliteratura Castellanes».

Biagioli foi tamién testigo de les manifestaciones pa la reivindicación lingüística «A pesar del sentimientu y de la voluntad común de los asturhablantes, güei en día so llingua sigue siendo considerada marginalmente con respecto al castellano, gozando nada más de una protección especial, más teórica que práctica. De fechu, en estos años, les medíes adoptaes por el principáu, en favor de la enseñanza del asturianu nes escueles, nun foron suficientes pa aumentar y valorar so utilización, ya que parte de la población entá la considera de menor prestigio y discrimina sos hablantes», afirma. Pa la autora del trabayu «Si el Principado nun va a aumentar el trabayu pa la promoción y la normalización lingüística, evidenciando los valores positivos, condenará el asturianu a la extinción».