El Gobiernu d’Asturies suma un recursu nuevu p’averar la llingua asturiana al públicu más mozo. Seronda Moza naz como una cita n’asturianu onde los más xóvenes pueden atopar una ufierta cultural y d’ociu desarrollada n’asturianu y gratuita. La primer edición de Seronda Moza va celebrase esti sábadu 26 de payares nel IES de Posada, en Llanera.
El programa d’actividaes, diseñáu dende la Conseyería de Cultura, Política Llingüística y Turismu, va ufiertar a lo llargo de tola xornada un mercáu cultural y d’asociaciones onde van participar empreses y entidaes que desenvuelven la so actividá n’asturianu. Amás, van facese dellos talleres y la ufierta musical va incluyir una jam session coral p’adaptar dos temes tradicionales n’asturianu y un conciertu de Llevólu’l Sumiciu.
Toa la programación ye gratis, pero la participación nos talleres precisa la inscripción previa en esti formulariu. Nun ye menester contar con conocimientos de asturianu pa participar en cualquiera de les actividaes que se van llevar a cabo. El programa de talleres previstos a lo llargo de la mañana tratarán asuntos tan variaos como la cocina, la actividá física, la creación de complementos, la composición de un rap o la elaboración de un cosplay a traviés del reciclaxe de algunos elementos.
