La de Silvia Quesada ye una de les voces más originales y personales de la música asturiana. Formó parte de la Banda de Gaites Cántara y del colectivu Muyeres. Amás, foi voz de los grupos de folk Los gatos del fornu, Blima ya Tejedor. Ensin embargo, so carrera en solitariu ta transitando por los caminos del pop, ya señalaos con La pena abierta, daqué que confirma con so nuevu trabayu en solitariu Prefiero ver llover.
Un llugar pa perdese una fin de selmana. Yo soi de les persones que piensen que ta mui bien conocer munchos países pero qu’enantes d’eso hai que conocer lo que tenemos alredor, nesti casu n’Asturies. Decidíme por un llugar namás paezme mui complicao, por eso voi dicir trés nos que pasé fines de selmana mui guapos: La Pola (Somiedu), Teberga y Arenas (Cabrales). Pero realmente n’Asturies cualesquier sitiu ye perfectu pa pasar una fin de selmana, lo importante ye dir cola compañía adecuada.
Un llugar pa vivir… Llevo ya unas cuentes mudanzes a mis espaldes, como buena maestra interina. De toos los sitios nos que vií, me quedo con L’Arena y, sobre too, con A Veiga. La gente se sorprende con esti últimu, pero siempre que me voy lo hago con gran pesar. Me siento una veiguiña más y creo que nun me equivoco al dicir que ellos tamién me consideran una más.
Un platu. Soi mui de platos de cuchara. Pa comer en casa, llenteyes, y si voi comer fuera, pote o callos.
Un postre. Como canto nuna canción: «prefieru más llegar ensin fame al postre».
Una playa pa pasar el día… Siempre me prestó la de Cueva, nel conceyu de Valdés, pero ahora nun me perdonaría nun hablar de la de Los Quebrantos, en L’Arena. Viví ellí un añu y picu y, anque los oriundos nun la pisan muncho, pa min siempre será un llugar especial.
Un pueblín que nun podemos dexar de ver. Os Teixois, ensin dulda. Ye un pueblu del conceyu de Taramundi con un encantu espectacular. Cuando tas ellí ye como si tornares p’atrás nel tiempu dellos sieglos.
Un chigre o zona pa tomar unos culinos. Nun podría quedar namás con unu. Cuando toi n’Uviéu voi bastante a Gascona, pero’l chigre de la capital que más me presta pa tomar unos culetes ye la Sidrería Serafín. En Turón también hai unu imprescindible cuando falamos de sidra: el Chuchu. Amás, tanto nel Serafín como nel Chuchu cómese d’escándalu, 100% aconseyable.
Un parque natural pa visitar. Toi más verde nesto de la naturaleza… Supongo que por cercanía habría dicir el de Fontes del Narcea, pero creo que toos merecen la pena.
Una fiesta a la que nun faltar. Barriendo un poco pa casa, San Roque de Tinéu.
Un muséu pa recomendar. La mio segunda profesión, el maxisteriu, llevóme toos estos años a conocer abondos museos asturianos. Sicasí, al últimu que fui, el Muséu de Belles Artes d’Uviéu, llevóme la faceta de cantante. Nun tuviera nunca ellí. Fui a cantar convidada por Pablo Moro y flipé. Tovía nun pude percorrelu enteru, ye una cuenta pendiente que tengo, pero dende llueu que ye recomendable.
Un momentu de la hestoria que te prestaría vivir. Del pasáu dalgún qu’otru, pero hai unu qu’espero vivir nun futuru non mui llonxano que ye la oficialidá de la llingua asturiana.
Un baille pa pasalo bien. Yo nun soi muncho de baillar, tengo que reconocelo, nunca tuvi munchu xeitu… Pero, anque lo faiga mal, nunca me resistiré a baillar un Saltón.
Una pallabra n’asturianu que te preste Calecer.
Una tradición que nun pue perdese. El batéu d’oru, los navayeiros… Hai munches tradiciones y profesiones que nun habríen perdese.
Una expresión en asturianu… Esta ye difícil… ¡Hai munches! Pero entá güei escuché una que nun conocía y que me gustó muncho: «Una focicada dala cualquier gochu».
