Llega estos díes a les llibreríes d’Asturies el númberu 25 de “Cultures. Revista Asturiana de Cultura”. Nesta ocasión la exa monográfica del volume preséntase como un analís coral, multidisciplinar dende les ciencies sociales, onde la reflexón antropolóxica encóntase en miraes téuniques y académiques proyeutaes dende la xeografía y la economía.  

El monográficu “La cultura asturiana, na encruciyada” dedica les sos primeres fueyes al artículu “Cambiu, crisis y recambiu: la sociedá rural  asturiana, ente la traxedia y la esperanza”, firmáu por David M. Rivas.  José Feito, entrevistáu por Roberto González-Quevedo, fala de  “Sincretismu perversu ya síntesis adautativa eficiente: dous conceutos  pa entender l’escenariu asturianu de desarrollu rural”. Pel so llau, Xosé  Nel Riesgo analiza una parte de la so trayeutoria profesional en  “Acabación de la memoria del paisax asturianu”. Xosé Alba contribúi al  númberu 25 de Cultures con “Área Metropolitana Central d’Asturies:  la ciudadona que nos tien de poner nel mapa”. Zarra’l bloque  monográficu’l propiu direutor de la revista, Roberto González Quevedo con “Los campesinos y el destín de la cultura asturiana: de la  familia tradicional al futuru inseguru”. 

Dos faces más completen esti númberu. Na etnográfica, Alberto  Álvarez Peña escribe de “Cuentos maraviyosos y d’encantamientos”.  Xuan F. Bas y Yolanda Cerra faen homenaxe y estudien a l’autora de la  primer obra antropolóxica asturiana: Purificación Viyao Valdés.