Déjala que baile (Melendi ft. Alejandro Sanz y Arkano) – 2018

Sí, sabemoslo. Esti nun ye'l cantar más famosu de Melendi. Nin siquier el más recordáu, pero nesti artículu falamos de cantares del branu, y nel de 2018 esta sonaba perdayuri. Melendi, na so versión yá más «pih.a», xúntase equí con Alejandro Sanz y Arkano del so álbum Ahora. Un cantar reivindicativu que realza y reivindica los derechos de la muyer.

Na Caleya (La Bandina) – 2006

Mientres nel branu de 2006, n'España taben pendientes del «corrá» del Coala, n'Asturies teníamos curiáu de non mexar en porricu na caleya. Esti simpáticu videoclip que celebraba los diez años del grupu La Bandina acabó tarareándola too Asturies pela cai, gracies tamién al espardimientu que-y dio la daquella acabante d'estrenase TPA. El cantar fíxose tan famosu qu'hasta Will Smith llegó a baillala… o eso ye lo que sal en Youtube.

Busindre Reel (Hevia) – 1998

Pue que la música celta seya lo último que se te vien a la cabeza a la d'arrexuntar cantares del branu, pero esta pegó, y pegó fuerte. Hevia sacara'l so segundu discu, Tierra de nadie, y el so single «Busindre Reel» llegó a sonar en tol estáu español. Tantu foi l'ésitu d'esti cantar gracies a un anunciu de televisión (como suel pasar de cutiu colos cantares del branu), que Tierra de nadie llegó a 6x platinos n'España, convirtiéndose nel asturianu que más discos vendió na hestoria. Un títulu que, dáu cómo camudaron los tiempos, probablemente naide-y quite nunca.

El tractor amarillo (Zapato veloz) – 1992

Poques duldes caben de qu'esti ye'l cantar del branu que salió d'Asturies por antonomasia. Corría l'añu 1992 y tol mundu, grandes y pequeños, sabíen que lo que se llevaba entós daquella yera tener un tractor mariellu. El grupu de Trubia Zapato Veloz, compuestu Javier Díaz Gotín, José Carlos Álvarez Fernández y Mario Mosteiro Fernández atopóse, de sópitu, con un «hit» (como dicen los modernos) que transpasó les fronteres hasta llegar a América llatina ya inclusive a Hong Kong. Los derechos del cantar siguen xenerándolos ganancies inda a día de güei. L'ésitu llegó a tal puntu, qu'en febreru de 2020 el grupu, reformáu, sacó un remix con estilu… ¿más modernu? Nós quedamonos con que consiguimos «meter» la nuesa llingua en tol mundu, anque namá fuere un «ye», que por daqué s'entama.