Muséu Etnográficu de Grandas de Salime “Pepe el Ferreiro”
Esti muséu, llocalizáu nel pueblu de Grandas de Salime, tien como oxetivu reunir, custodiar, caltener, incrementar, investigar, esparder y comunicar el patrimoniu material ya inmaterial de calter etnográficu de les comunidaes del Occidente d’Asturies. El muséu, fundáu nel añu 1984 pol enfotu en caltener material etnográficu de J. Mª Naveiras Escanlar, Pepe el Ferreiro, ta situáu na antigua casa rectoral del pueblu, la Casa del Molineru y A Casoa y n’él podemos ver los modos de vida del occidente d’Asturies.
MUJA (Muséu del Xurásicu d'Asturies)
El Muséu del Xurásicu asitiáu en Colunga y con un edificiu en forma d’una gran güelga tridáctila de dinosauriu, acueye una de las muestres más completes y didáctiques del mundu sobre estos fascinantes reptiles. L’oxetivu que tien esti muséu ye’l d’amosar la evolución de la vida na Tierra hasta la llegada del home, centrándose na Era de los Dinosaurios. Ensin dulda, un muséu perfectu pa visitar en familia.
Muséu de la Sidra
Esti muséu, asitiáu na llocalidá de Nava, tien como oxetivu esparder y dar a conocer la bebida tradicional d’Asturies. Al traviés d’un percorríu pel edificiu, podemos ver cuál ye’l ciclu de la sidra dende la recoyida, pasando pela preparación y prensáu, hasta llegar al momentu del consumu, cola representación d’un chigre típicamente asturianu.
Muséu de la Minería y la Industria
El muséu mineru, situáu na llocalidá de L’Entregu, tien como oxetivu poner en conocencia del públicu la tradición minera de les cuenques y tamién la tradición metalúrxica. Al traviés d’un viaxe pel interior del muséu, podemos aldovinar como yera la vida na mina y podemos garrar un tren que va llevanos a la Mina San Vicente, asitiada al llau del propiu muséu.
