Ente les películes que nos regalé esti yá pasáu branu, Old (Tiempo) de M. Nyght Shyamalan foi ensin dulda una de les destacaes y más comentaes. Lo nuevo del director d'ésitos como El sexto sentido o Señales volvió respiganos col so inconfundible estilu de Suspense, xuegos psicolóxicos y xiros inesperaos marca «de la casa».
Nesti casu, Old (Tiempo) cúntanos la hestoria d'una familia qu'empieza a atalantar que na recóndita sablera escoyida pa relaxase nes sos vacaciones familiares asoceden delles anomalíes temporales. La hestoria ta basada na novela gráfica del realizador y guionista francés Pierre-Oscar Levy y l'historietista ya ilustrador suizu Frederik Peeters llamada Castillo de arena. Pero lo interesante ye que Levy basóse nuna sablera bien conocida pa tolos asturianos: la sablera de Gulpiyuri en Llanes.
Nel prólogu, Levy esplica como dende pequeñu braniaba siempres n'Asturies, pero que nun foi hasta l'últimu branu, a los 17 años, cuando conoció esta sablera que lu encandiló. Confesó que "atopase con un llugar tan especial espertó les mios ganes de faer una película, y por tantu escribir un guión». Pa él, «faer una película basada namás nun escenariu paecía imposible, magar que la sablera yera un llugar real y una fantástica trampa pa turistes. Y tamién una trampa pa la imaxinación".
El resultáu foi esta respigante hestoria qu'acabó llamando l'atención del prestixosu cineasta M. Nyght Shyamalan qu'arrasó en taquilla esti branu.
