L'horru ye mui útil pa la casa asturiana porque defende los alimentos de la humedá, de los ratos y otros roedores. Al tar aislláu del suelu gracies a los pegollos, les coses guardaes nél consérvense seques y tarden muncho más en podrecer. Otramiente, la construcción permite una ventilación continua, que tamién favorez que tean sanos los productos guardaos nél.

Los ratos y los roedores nun son pa xubir porque la muela nun los dexa pasar y asina lo que guarda l'horru nun lo comen nin lo esfociquen los bichos. Hai que tener cuidáu de nun poner enxamás palos apoyaos nél, porque entós les mueles yá nun seríen eficaces. Cuando s'usaba la parte d'embaxo d'esti como sitiu pa carpintería o pa cualquier otra cosa, pónense baldoses pa que los bichos nun seyan pa esguilar.

Amás de guardar alimentos, los horros tamién podíen valir pa otres coses y en dellos casos usábense pa dormir xente de la casa.

L'horru ye un elementu mui necesariu na casa y por eso cuasi toles cases campesines asturianes teníen un pal so usu. Pero en mui bien de casos taba dividíu ente delles families, de manera qu'un mesmu horru podíen usalu más d'una casa.

Pero amás d'ocupar un sitiu físicu xunto a la vivienda familiar ocupa tamién un sitiu na mentalidá de les paisanes y los paisanos asturianos. L'horru ye esi espaciu insustituible onde guardar les fabes, el maíz, les patates, les cebolles, etc. Son munchos los informantes que dicen que cuando emigraren a la ciudá lo que más echaben de menos yera l'horru. Y cuando volvíen pal pueblu entrugáben-yos cómo s'arreglaben pa vivir na ciudá ensin tener unu.

Nun hai qu'escaecer que l'horru ye tamién un símbolu indentitariu asturianu: si vemos unu sabemos que tamos n'Asturies o mui cerca. Otramiente, la propia figura del horru tien una simetría, un esquematismu y un carisma especial pa funcionar como iconu identificativu de Asturies. Nesti sen hai interesantes proyeutos pa convertir l'horru nun símbolu emblemáticu de la identidá, agora que yá la economía rural ta cambiando y los usos del horru tienen que se orientar a otres perspeutives de futuru.

Conoz más símbolos identificativos d'Asturies, como Les espiches, equí en VerAsturies.