El famosu Desfiladeru de Les Xanes ta asitiáu ente los conceyos de Santu Adrianu, Quirós y Proaza. El regueru que lu forma denomínase Viesca, o Les Xanes. Esti camín fíxose col fin de xunir los pueblos de Pedroveya, Dosango y La Rebollá col valle del Trubia. Esta ruta siempres foi comparada cola Ruta del Carespoles paredes verticales bien grandes de roca caliza.
La escursión empieza nel área recreativa'l molín de Les Xanes. A lo primero, xúbese a la izquierda per una carreterina. Dempués tómase un senderu a la derecha, que nos lleva per un pedreru hasta les puertes del desfiladeru. En pasando'l túnel del Cerezal llabráu na roca vamos llegar a la zona conocida pol Valle Pequenu. Dempués de media hora, y de travesar otru pedreru, vamos llegar al Valle Grande, pasando pol túnel de La Virxe, yá metanes un paisaxe magníficu. La sienda tien casi dos metros d'anchu, na mayor parte del so trazáu.
Esti últimu tramu del percorríu ye bien fermosu y la sienda yá va al altor del ríu. Antes de llegar al pueblu de Pedroveya, tenemos una pindia xubida per senderu o pel prau asitiáu al pie de la ilesia.
El regresu puede facese pel mesmu itinerariu, si nun tenemos quién nos recueya en Pedroveya. Tamién podría tornase pelo alto del escobiu, a la so derecha, pol pueblu de Dosango y el vieyu senderu de Peña Rei. O pola so esquierda, siguiendo la carreterina que xube a l'aldega de La Rebollá dende la ilesia de Pedroveya.
