El muséu del ferrocarril n'Asturies atópase emplazáu nos terrenes de l'antigua Estación del norte en Xixón. Tratase d'un centru d'investigación qu'amuesa la importancia del ferrocarril na hestoria social, económica ya industrial de los postreros 150 años d'Asturies. Amuesa más de 350 pieces n'esposición y más de 50 de material móvil, amás d'otros elementos ferroviarios.
L'espaciu del muséu componse del edificiu de la estación vieya, l'edificiu de la esposición permanente, los andenes, la sablera de víes, la nave y l'espaciu esternu que lu arrodia. De les antigües instalaciones de la estación caltúvose l'edificiu de viaxeros.
El Muséu del Ferrocarril presenta al visitante la hestoria d'esti mediu de tresporte n'Asturies. El percorríu empecipia con una introducción al mundu del ferrocarril realizada al traviés d'un puntu de vista cronolóxicu. Dempués amuésense les característiques del Ferrocarril n'Asturies, faciendo un percorríu pol territoriu del ferrocarril, el tren de la industria y el tresporte ferroviariu, pa terminar cola hestoria del ferrocarril n'Asturies.
Ente la colección del muséu destaca'l material móvil espuestu nos andenes de l'antigua estación y la sablera de víes. Una tercer sección del muséu ta destinada a la xente del ferrocarril, a los viaxeros, ferroviarios, compañíes ya inxenieros.
Finalmente'l sistema ferroviariu, les maquinas, el ferrocarril de la industria y la mina, la estación de Xixón y el tren del muséu, nel que los visitantes van poder viaxar en vagones arremolcaos por máquines de vapor, completen la visita.
