Morcín ye un conceyu que lo tien too: naturaleza, deporte, patrimoniu… ¡y gastronomía! Y en xineru tolos tos planes gastronómicos tán en La Foz. Casadielles, nabos y quesu afuega’l pitu axuntar nesti mes pa realizar unes xornaes gastronómiques en Morcín. Dempués de ver el programa, te va resultar difícil nun dir.

Tastia los nabos cola so famosa cofradería

La fin de selmana de'l 12 y 13 de xineru va ser el tiempu d'esfrutar de los nabos, col XVIII Gran Capítulu col siguiente programa:

A les 6 de la tarde del 12 de xineru, va ser el recibimientu a la embaxada de Nabos y Companhía, Confrería portuguesa hermanada cola de Morcín y que vien de la Freguesia de Carapelhos, nel Concelho de Mira-Portugal. De siguío, va celebrase la cena d'Hermandá nel Edificiu Municipal de Servicios Múltiples cola Confrería hermanada y toles cofraderíes que deseyen acompañalos, con un preciu de 15 euros.

El día 13 de xineru va siguir la celebración. A les 9:30 va realizase la recepción y almuerzu coles cofraderíes asistentes y convidaos nel Edificiu Municipal de Servicios Múltiples. A les 10:30 va ser el tiempu de la Solemne función relixosa cantada pol coru Ars Senatorum. Darréu, a les 11:15, va empezar el Desfile de Confrería peles cais de la Foz, acompañaes pela banda de gaites Xácara d'Uviéu y l'Agrupación Folklórica Picu Villa de Riañu (Llangréu).

A partir de les 12:00, na plaza del cura, va haber una visita y tastia de productos alimentarios asturianos y tasties gratuites de diversos productos y, a les 12:45, va celebrase la Ceremonia del XVIII Gran Capítulu na ilesia, nomando a los Cofrades d'Honor y de númberu. A lo último, a les 14:30, va celebrase la comida de confraternización.

Visita'l concursu mundial de casadielles

El miércoles 17 de xineru llega'l momentu de les casadielles col XIV Concursu mundial de Casadielles, entamáu pola Hermandá de la Probe. La xornada va empezar a les 10:00, con un pasucais amenizáu pola bandina Los Gascones y la recepción de les casadielles participantes nel concursu nel salón polivalente de la Escuela Llar. Darréu, a les 12:00, va realizase la procesión de San Antón y a les 12:15 va empezar la Misa Solemne.

A les 13:00 va realizase la puya del ramu y productos del campu astur y 15 minutos dempués van apurrise los premios del XIV Concursu mundial de Casadielles. Tres ello, va haber una tastia popular del pote de nabos de la Cofradería.

Prueba'l quesu afuega’l pitu en Morcín

El quesu afuega’l pitu tamién tien el so espaciu en Morcín. Y ye que, anguaño, celébrase'l XLVII Certame del Quesu Afuega’l pitu en La Foz de Morcín. Va ser mientres el sábadu 20 y el domingu 21 de xineru. La nueche del sábadu va ser pa les actuaciones del Grupu K-libre y DJ Masid.

El domingu 21 va empezar a les 10:00, cola apertura de la esposición de los quesos participantes, que va tar hasta les 15:00, y va celebrase el XI Trail de Monte Xubíu al Monsacro. A les 11:00, l'alcalde del conceyu va realizar l'apertura oficial y, a les 11:30, va ser la solemne función relixosa. Dende les 12:00 va faese la demostración pública de la ellaboración del Afuega’l pitu al cargu de Margarita Mier, artesana de Morcín. A partir de les 13:10 va apurrise'l galardón de Queseru Mayor, Afuega’l Pitu d'Oru y Nabu de Plata. Tamién a los ganadores del Certame. A les 13:30 va facese puya pública de los quesos ganadores.