Los Guilandeiros vuelven un añu más a Tinéu. Nesta ocasión, la cita va tener llugar el día 10 de febreru y van visitase los pueblos d'El Pedregal (de 12h a 14h) y Caeras (magar de les 17:30h).
Esta vegada la comparsa ta formada por trenta miembros que van dir acompañaos poles gaites y escenificarán la obra teatral, “El casoriu” , conformada por personaxes yá conocíos como los xamasqueiros, el vixirigueiru, la dama y el galán, l'osu, el diañu, el ceniceiru, los guapos, la preñada, etc. Dempués de la representación artística ye común que se pida l'aguilandu.
Foi nel añu 2011 cuando los vecinos de Tinéu decidieron recuperar la tradición de los Guilandeiros tres nun celebrase dempués de mediu sieglu. Unu de los oxetivos principales del grupu ye llevar allegría, humor y coloríu a los distintos pueblos de la zona. A lo llargo de los años los Guilandeiros visitaron munchos pueblos del conceyu y anguaño treslládense hasta El Pedregal y hasta Caeras. El trabayu d'esti grupu lleva planiándose selmanes ya inclusive meses antes onde prima la collaboración de los vecinos del pueblu pa qu'esta tradición siga calteniéndose añu tres d'añu.
Otra de les tradiciones que siguen faciendo los Guilandeiros ye la participación colos centros educativos de Tinéu ente los que s'atopen el Colexu Verdeamor, el Colexu de Navelgas y l'I.E.S Conceyu de Tinéu pa que la tradición llegue a los más nuevos del conceyu. Pasada yá la fecha de los Guilandeiros, nel mes de marzu, va realizase'l taller de la Escuelina de Guilandeiros nel Colexu Públicu de Navelgas.
