Asturies guarda como una ayalga aquelles poques construcciones que recuerden al pasáu medieval de rellumanza que tuvo colos reis asturianos. Llugares como Santa María del Naranco o'l Conventín son dalgunos de los más conocíos. Sicasí, el conceyu de Les Regueres conserva la ilesia de San Pedru Nora, una d'eses edificaciones eclesiástiques del arte asturianu que nun llega a ser tan conocida como'l restu. Ye por eso que, güei, en VerAsturies, enseñámoste una xoya del nuesu patrimoniu prerrománicu, una xoya que munchos comparen cola ilesia de Santuyano d'Uviéu.

Un edificiu con muncha hestoria

Nun conocemos nengún documentu que se refiera al momentu fundacional de la ilesia de San Pedru Nora hasta l'apaición del Llibru de los Testamentos del obispu Pelayo d'Uviéu, marcando la so esistencia dende principios del sieglu XII y cites d'una ilesia de San Pedro, na villa Naura, dataes en 1078 y 1079.

Sicasí, pa ver anguaño la planta orixinal, tuvo que pasar por munches fases. Y ye que, por munchu tiempu, la ilesia paecía otra, yá que les sos constantes reformes fixeron que perdiera la so apariencia orixinal. Pa conocelo, hebo que facer numberoses escavaciones arqueolóxiques, que sacaron a la lluz el treme orixinal.

Trátase d'un edificiu basilical de trés naves, con cuatro tramos sobre arquerías de mediu puntu sofitaes en pilastres cuadrangulares, y triple cabecera rectangular, de testeru rectu únicu. Cuenta, amás, con dos dependencies llaterales de planta rectangular abiertes al segundu tramu de les naves llateral y dispuestu en doble altor, lo que constitúi una novedá nes soluciones arquitectóniques asturianes. 

Solamente hai un elementu que descuadra colo que sería la construcción orixinal. Falamos del campanariu pal que nun esisten nin fundamentos arqueolóxicos nin tipolóxicos. Construyóse na amplia restauración ente 1952 y 1964.

¿Cómo llegar a la iglesia de San Pedru Nora?

Esti históricu edificiu atópase tan solo a 10 kilómetros d'Uviéu, polo qu'aportar a él ye bien cenciellu. Dende esta localidá, namás vas tener que salir pola A-63 escontra Grau-La Espina. Darréu, vas tener que tomar la N-634 hasta la salida 9 escontra Trubia y esviase escontra Nora nuna glorieta a unos 2kms. D'esta manera, vas ver la ilesia a la to esquierda.

La visita a la ilesia tien un preciu, pero ye simbólicu, yá que cuesta 1€. Si vas en grupu de más de 20 o 30 persones, el preciu va ser d'unos 10€.

Xunto con esti edificiu, l' arte asturianu o arte prerrománicu compónse d'otres construcciones como'l Conventín o Samiguel de Liño, ente otres. Conózles gracies a VerAsturies.