A 600 metros sobre la mar, a metá de camín pela carretera que xune Colunga y Les Arriondes, atopamos una construcción a primer vista estraña que se levanta sobre los árboles al final d’unes escaleres. Falamos del Miradoriu del Fitu, situau nes coraes de la Sierra’l Sueve nel conceyu de Caravia.

            El propiu nome del miradoriu danos una pista d’ónde atopalu, nel fitu xeográficu que separa estes dos villes asturianes. Nun cabe dulda que foi siempres una parada obligatoria pa tolos que pasaben per ehí, porque les vistes son ablucantes. Quiciabes por eso nel añu 1925 decióse facer una construcción pa que tolos turistes, y non turistes, pudieran disfrutar de les maravilles d’esi paisaxe incluso per enrriba de los árboles. Anque’l procesu de construcción nun foi fácil, yá que nel añu 1926 los promotores d’esa obra fueren desapaeciendo y quedaren ensin soporte económicu. A la desesperada, llanzóse una círculos nos periódicos d’Asturies pidiendo ayuda económica pa terminar el miradoriu. El llamamiento foi un ésitu, ficiéronse aportaciones individuales, colectives y hasta de materiales per dellos conceyos d’Asturies y el miradoriu acabó inaugurándose nel añu 1927.

            El resultáu nun pudo ser meyor y más ablucante pa tolos visitantes d’esta construcción tan llamativa conocida pola xente como “El cazu” pola so forma. Dende esti miradoriu tenemos una vista perfecta de prácticamente tola costa occidente asturiana: la sierra’l Sueve, el Parque Natural de Ponga o los Picos d’Europa, protagonicen esti paisaxe dibuxau tamién poles playes de la Griega, Llastres… una visión de 360 grados de pura maxa.

            Pero la visita al Fitu nun queda namás nel miradoriu. Amás de los caminos que topamos alredor, con guapes viesques, tenemos un merenderu, rutes nes que perdese, y sobretou, munchos sitios onde facer les semeyes más ablucantes que pudiéremos imaxinar. Eso sí, son d’eses semeyes que s’esfruten más en directu y que nun puedes perdete.