La hestoria del surf en Tapia entama cola figura de dos hermanos Peter y Robert Gulley. Tenémonos que remontar al añu 1968 cuando taben realizando un viaxe per Europa. Esti viaxe yera típicu facelu al acabar los estudios y antes de ponese “les piles” , pa enfrentase a la seriedá de la vida. Cuando llegaron a la sablera de Tapia quedáronse prendaos pola sablera y les foles de la localidá. Con eses decidieron permanecer un par de díes en tierres tapiegues enantes de volver a entamar la so marcha pol vieyu continente a bordu de la so furgoneta y les sos indixebrables tables. Nun llegaron bien lloñe, pos se diz que, al llegar al altor de L.luarca, sintieron de nuevu “la llamada” de Tapia. Nesi momentu teníen que decidir ente siguir percorriendo'l mundu o volver y pa ello llanzaron una moneda al aire. Nun sabemos si'l resultáu foi cara o cruz, pero lo cierto ye que los aussies tornaron pa Tapia. 

Los tapiegos taben mui ablucaos de daqué que nunca antes nun vieren, xente na agua que podía eslizase sobre les foles gracies a una estraña tabla. Cuando Peter y Robert s'establecieron en Tapia mientres tol branu del 68, fuertes llazos d'amistá surdieron ente ellos y les xentes del llugar, y asina con amistá y como un xuegu, empezó a practicase'l Surf en Tapia.

Al añu siguiente decidieron volver y con ellos más amigos Australianos, y asi un añu tres otru, los llazos diben estrechándose ente Australia y esti guapísimu rincón asturianu. Gracies a ello esisten delles families formaes ente mozos australianos y asturianes, el sangre llego a xunise.

A partir d'esi momentu, el surf empezó a practicase y a popularizase ente los paisanos y Tapia foi pionera na práctica d'esti deporte en tol país y n'Europa. Nel añu 1991 producióse'l fallecimientu de Peter, que dexara por escritu que les sos cenices fueren refundiaes a la sablera que tanto amaba. Tapia y Australia xuniérense pa siempres. 

Tapia ye na actualidá un referente nel mundu del surf y cada añu celebra'l Campeonatu de Surf Memorial Peter Gulley Goanna Pro, que cada Selmana Santa enllena les cais de la villa de visitantes.