Somiedu ye, ensin dulda, una tierra de vaqueiros d’alzada, ese xentes que percorríen les brañes del occidente d’Asturies y que trespasaben les llendes pa Llión. Na ruta de güei vamos pasiar pel conceyu de Somiedu y esfrutar los paisaxes que agüeyaron los vaqueiros y que por suerte, se caltién en la gran mayoría de los sitios.
La ruta entama en Val.le de L.lagu, y va allargase mientres 6 kilómetros pa llegar al llagu del Val.le. Aparcando’l coche enantes de llegar a L’Auteiro, la ruta sigue un camín ente los praos de siega y un fayéu hasta llegar a un desvíu que nos va llevar a la Pradera del Val.le, dende onde va subise al llagu del Val.le, onde esfrutar d’esti llugar tres cruzar el ríu y pasar per una de tantes brañes vaqueires qu’hai en Somiedu, que ye la braña de Murias L.longas. Sicasí, hai otru camín nesi mesmu desvíu que va directamente al llagu, polo que nun ye necesariu pasar per esta braña, anque encamentámosvos qu’esfruteis de la cultura vaqueira. Esti llagu, quiciás dalgo desconocíu ye, con 24 ha, el de mayor superficie d’Asturies y que debe’l so tamañu a les obres que se ficieron pa la hidroeléctrica del conceyu de Somiedu, La Malva.
Esta ruta de 6 kilómetros, cenciella y pa facer en poco más d’hora y media, ta adaptada pa too tipo de persones, asina que nun duldes en facela.
