Nel Trasiegu Fest, festival de la cultura sidrera asturiana, como nun podía ser d'otra manera, la sidra foi la protagonista. Valverán, Sidra Trabanco y Viuda de Angelón fueron les encargaes de clausurar una primer edición d'esti festival onde la sidra ye'l late motiv. Valverán, Sidra Trabanco y Viuda de Angelón fueron les marques que los asistentes pudieron tastiar nel actu de clausura celebráu nel palaciu de Martimporra (Bimenes), consistente nun taller de cocina sidrera, una mesa redonda sobre la muyer nel mundu de la sidra y una cata de sidres de gala, unu de los productos más innovadores nel mercáu sidreru. Al distinguíu actu acudieron autoridaes d'instituciones públiques, mesmo que representantes de dellos sectores sidreros, como la comunicación o la xestión d'eventos.

Per una parte, Valverán ufiertó al públicu la degustación de la so sidra de xelu 20 Manzanas. El llagar ye pioneru nesti productu y, esi emprendimientu, faise notar. Asina lo fixeron saber na degustación del Trasiegu Fest. 20 Manzanas llámase asina porque se precisen, a lo menos, 20 mazanes pa ellaborar el conteníu d'una botella de 37,5 cl. Estes mazanes, dempués de ser escoyíes manualmente, llavaes y esaminaes nuna mesa de selección, máyense, prénsense y, el mostiu llográu decántase en depósitos d'aceru inoxidable por aciu l'aplicación de fríu. Una vegada clarificáu, esti mostiu conxélase a -20º C. Tres un procesu lentu de separación del xelu y el mostiu, la esencia llograda formienta mientres 10 meses a una temperatura de 10º C y, dempués, permanez mientres 8 meses en depósitos d'aceru inoxidable. D'esta manera, la resultancia ye una sidra con un sabor esquisitu ya intensu y notes de mazana, carambelu y miel, creando un bon equilibriu ente acidez y frescura.

Per otra parte, Sidra Trabanco asistió a la degustación p'amosar a los sos asistentes la so primer sidra natural d'autor, la sidra Alicia, pensada y ellaborada especialmente pal so consumu en copa, ensin necesidá del tradicional escanciáu. Con esti innovador productu sidreru l'oxetivu ye proponer a Alicia como otra opción al consumu de vinu blanco. Amás, trátase d'un productu que destaca pola so esclusividá, yá que namás va producise cuando se cumplan les condiciones d'ellaboración esixíes por Samuel Trabanco. D'esta manera, consíguese una sidra llimpio y brilloso clarificada por decantación en frío con toques frutales, cítricos y un sabor nel que predomina l'acidez típica de la sidra.

A lo último, Viuda de Angelón presentó na degustación del Trasiegu Fest la so sidra de xelu. Del prensáu d'un variáu amiestu de mazanes acedes – duces, llógrase'l mostiu. Tres un procesu de concentración per conxelación de los mostios, estrayen la esencia de la mazana, tres la cual, llevar a fermentar pa llograr la sidra de xelu. El resultáu, un ricu color ámbar con notes de mazana asada. Deliciosu balance ente azucre y acidez.