Setiembre y ochobre son meses de munchu trabayu nos llagares, col envís de que la sidra llegue a tolos llugares, como por casu a la cocina. Poro, güei recomendámosvos estes trés recetes con sidra pa sorprender a los tos convidaos. Prepárate, que vamos cocinar.

Escabeche de sidra

Vamos usar pa esta receta un vasu de sidra como referencia. Darréu, los ingredientes.

  • 2 vasos d'aceite d'oliva
  • 1 vasu y ½ de sidra
  • ½ vasu de vinagre
  • 2 dientes d'ayu
  • 1 fueya de lloréu
  • 1 cebolla en xuliana
  • 1-2 cenahories
  • sal pimienta y pimentón opcional
  • pexe azul al gustu (sardines, bonito, xarda...)

Entemecemos tolos ingredientes y dexamos ferver unos 10 minutos. Darréu, añedimos el pexe azul col fueu apagáu y va terminanos col calor residual.

Conseyu: Meyor dexar a lo menos 12 hores na nevera enantes de comer.

Pitu a la sidra

Un platu principal que nun va dexar indiferente a naide. Darréu, los ingredientes.

  • 1/2 llitru sidra
  • 1 cebolla grande
  • 2 tomates
  • 2 cenahories
  • 100 gramos farina
  • 2 fueyes de lloréu
  • Sal
  • Pimienta negra
  • Aceite d'oliva virxen estra

Llavamos el pitu, escurrímoslo y lo salpimentamos. Lo enfarinamos, y freímoslu a fueu medio nun cazu con aceite d'oliva. Sacamos el pitu y acutámoslu. Pulgamos la cebolla, cortamos a trocinos pequeños y nel mesmu aceite de freír doramos el pitu. Pulgamos les cenahories, cortámosles en rodaxes y añedimosles al cazu xuntu cola cebolla, lo sofreímos xuntu un par de minutos.

Ye'l momentu d'añedir el tomate arralláu ensin piel, entemecemos bien, salpimentamos al nuesu gustu, añedimos les dos fueyes de lloréu y dexamos a poco fueu hasta que'l tomate pierda'l so agua y amenorgue. Cuando tea llistu'l sofritu vamos añedir al cazu'l pitu y cubrir cola sidra y col agua, y col fueu a baxu/mediu y cola tapa casi tapada vamos dexar hasta que'l pitu tea tienru.

Crema de sidra

Un postre pa chupase los deos, Darréu, los ingredientes.

  • 20 gr de maicena
  • 1/2 llimón
  • 20 gr. de zucre
  • ½ llitru de sidra
  • vaina de vainilla al gustu

Cocinar una crema de sidra ye bien cenciello. Vamos empezar col llimón. Vamos usar la so piel, vamos arrallar y depués vamos estrumir. Esti ingrediente dará-y esi sabor cítricu que va consiguir facer resaltar la mazana.      

Ponemos la maicena con un pocu de la sidra, disolvémosla hasta que tea integrada. El restu de la sidra, l'arrayadura de llimón y el zusmiu de llimón entemecémoslu col azucre y la vainilla. Calecemos tolos ingredientes. Cuando tea caliente añedímos-y la maicena qu'entemecimos cola sidra. Añedir adulces pa que nun queden grumos.

A midida que vuelva llegar al puntu de ebullición va dir garrando la consistencia necesaria para convertise nuna crema increíble.