El conceyu d’Ayer ye un destín turisticu nalzáu qu’ufierta naturaleza, gastronomia y patrimoniu. El turista que visita Ayer atopase inmersu nun territoriu enllenu de requexos nos que perdese pente viesques, monumentos de distintes domines y brañes inesperaes qu’entovía s’enllenen de ganau pel branu. Un conceyu cargau d’historia y marcau pel espaciu industrial de la mineria carbonifera qu’afuracara les coraes d’esta tierra y de la so xente per mas d’un sieglu.
Acabada la domina minera, el conceyu tuvo que reinventase al quedar ensin el so principal motor economicu. Cierto ye que l’agricultura y sobre too la ganaderia siguen ocupando a una parte de la población, especialmente na zona del Altu Ayer, famosa ente otres coses polos sos productos carnicos. El visitante nun puede dexar de parar a xintar en dalgun de los munchos restoranes qu’ufren la meyor carne de quilometru cero, especialmente xatu tenral, corderu y caza (corzu y xabaril, sobre too). Ente los dulces, destaca’l panchon, un postre tradicional fechu a base de farina d’escanda, a lo que se-y añade mantega y zucre.
Rutes y naturaleza
Otru gran puntu fuerte del conceyu ye la naturaleza. Son munches les rutes y llugares d’interes pal turista amante del monte y de la viesca. Dalgunes de les rutes que merecen mencion son: Cascada de Xurbeo (dende Murias, dificulta: facil), Foces d’El Pino-Foces de Ruayer (dende El Pino, dificulta: media-baxa nel tramu hasta les Foces d’El Pino y media-alta hasta la Paraya), Bosque d’El Gumial (El Fielato, media) o Les Brañes (Felechosa, media-alta). Si amas d’una ruta de dificulta media-alta’l visitante tien interes en xubir un picu y esfrutar d’unes vistes increyibles, la ruta d’ascensu a Peña Mea dende Pel.luno ye un esfuerzu que paga la pena facer. La ruta pasa per una formacion rocosa inconfundible como ye l’Arcon (conociu como Gueyu de Gue), que lliteralmente ye un furacu d’unos 20 metros de diametru, causau pol desgaste meteoroloxicu, qu’atraviesa la pare caliar del monte.
Tocantes al deporte venceyau a la naturaleza, Ayer cuenta con una ufierta bien amplia. Si la estacion d’esqui Fontes d’Iviernu ye una atraccion perconocida, el conceyu tamien destaca como puntu de partida pa numberoses rutes de senderismu y BTT.
