Nel oriente d’Asturies, na llocalidá de Llames, en Pría (Llanes), atópase unu de los monumentos naturales más impresionantes d’Asturies.
La erosión de la mar y l’agua na roca caliar creó resquiebros y chimenees que conecten la mar cola tierra. Esto fai qu’en díes de fuerte marexada heba un espectáculu natural únicu: l’agua, xunto al aire, salen espulsaos per estes galeríes algamando gran altor.
El meyor momentu del añu pa visitar los Bufones de Pría son los meses de la seronda y l’iviernu, una y bones la probabilidá de qu’heba una marexada más fuerte ye mayor.
Los bufones atópense nuna redolada de cantiles ya impresionantes paisaxes, ideal pa pasiar a lo llargo de la ruta esistente que contempla llugares como’l Pozu de Les Grulles, les sableres de Villanueva o Cueves del Mar y pueblos como La Pesa o Garaña.
Un llugar máxicu que nun dexa a naide indiferente y al que Dolores Sánchez Buergo «La Galana» dedicó dalgún de los sos poemes.
La lleenda del Cuélebre
Un espaciu como esti, tan distintu, tan especial, tan inesplicable n’otros tiempos, nun podía dexar de tener lleendes. La más conocida ye aquella que cunta que debaxo los bufones vive dende va sieglos un cuélebre, esi ser mitolóxicu que ye una culiebra xigante con ales.
Esa culiebra, cuéntase, fuera un home condergáu a tala condición por tirar pelos cantiles a la so propia fía y al so namoráu dempués de sorprendelos xuntos n’actitúes amorosiegues. Avergoñáu pola so acción y pol so aspectu monstruosu, metióse ente los furacos de los cantiles viviendo ellí eternamente.
Cuando ta más atristayáu o enfocicáu, echa l’aire y el fueu pela boca creando les columnes d’agua que xuben y el ruxir que xeneren, que nun son otro, acordies con esta lleenda, que los sos bramíos desesperaos.
