Quiciabes Esther Sastre nun ye un de les deportistes más conocíes de la historia del deporte. Nun ye un “Villa” o un “Fernando Alonso”, pero ensin dulda rompió’l molde va bien de tiempu. D’ehí que-y dedicaren una cai en Xixón.
La so historia remóntase a unos años enantes de la guerra civil, el 12 de setiembre de 1930, cuando se celebraba en Xixón el que n’aquellos momentos se consideraba el mayor derby de natación d’Asturies: dos kilómetros y mediu nalando nel Cantábricu. Y ehí taba Esther Sastre, con 20 añinos dispuesta a ser la primer muyer en participar nesa competición, pese a tar en desigualdad de condiciones. Y ye que los trajes de baño que llevaban les muyeres en aquella época, más destinaos a esconder el cuerpo femenino que a que nadasen con comodidá, pesaban el doble que los bañadores de los varones. Y anque nun ganó la carrera, foi capaz de acabarla con éxito (rechazando la ayuda de la canoa de salvamento) y foi la protagonista de los periódicos al día siguiente.
Aquel día Esther dio un pasu bien grande pa la igualdá de les muyeres que, cuasi cien años dempués, siguen dándose pasos pali que pali nun mundu, el del deporte, en que una muyer entá tien d’algamar el doble d’éxitos qu’un home pa tener cierto reconocimientu.
- Conceyu
- Xixón
- Sección
- Curiosidaes
- Fecha
