Una de les celebraciones tradicionales de la seronda y que se lleva realizando nos pueblos asturianos dende va munchos sieglos ye la esfoyaza. Anque nos nuesos díes seya una actividá casi testimonial, cuando’l maíz yera unu de los principales alimentos de los asturianos, podía vese en tolos llugares a les persones trabayando en comunidá. Esti trabayu, amás de suponer un llabor importante pal sustentu de les families, yera un motivu d’alcuentru, yá que, en rematando la xera, toos axuntábense pa celebrar el fin del trabayu con festexos y dellos xuegos.
Esta actividá tien dos pasos, que son:
- Esfoyar les panoyes. Eliminábense casi toles fueyes, menos dos o tres. Eses fueyen van ser les utilizaes dempués con una finalidá bien importante.
- Facer riestres. Coles fueyes que nun se quiten, trátase de facer una coleta con delles panoyes. estes riestres son les que cuelguen de los horros o paneres a secar.
Hai munches canciones que nos describen el carácter festivu de esti trabayu fechu en comunidá: Al comenzar la esfoyaza nun me tiréis la panoya que toi faciendo una riestra y tengo les manes ataes.
En ocasiones, estes canciones se salían de tono y podían nun gustar a les fuerces del orden: El cantar de la panoya yá nun pue cantar porque dicen qu’echa multa el guardia municipal.
Tamién el cortejo tenía so espaciu en estes canciones: La panoya que m’unviasti nun la quixi recibir que mio madre yá nun quier que cortexe a un mozu ruin.
Y tu, ¿trabayasti dalguna vegada en dalguna esfoyaza?
