Pa llegar a beber la sidra que toos y toes conocemos hai detras un procesu bien llargu. Son dellos los pasos a siguir pa que la mazana se convierta na bebida asturiana mas reconocida. Dos fases importantes son la panada y la mayanza, imprescindibles pa esfrutar de la sidra. Poro, vamos afondar nestos pasos qu’anguano malapenes se ven, pero que ye importante caltener.
Los pumares asturianos suelen dase en praos onde crez la pacio, que xeneralmente s’aprovecha pa segar y dar a les vaques como alimentu diariu. Estos praos enllenos de pumares llamense pumaraes, que precisen d’un cuidau curiosu pa que seyan a producir tolos anos, pues a un anu bonu suel siguir siempres otru de produccion mas ruina. Cuando l’anu yera de sidra, de muncha produccion, movilizaba la familia pa facer la panada de la mazana pela seronda, que solia entamar nel mes de setiembre.
La xente diba a la pumarada a panar les mazanes en sacos o en maniegues y macones. Panabense primero les mazanes que cayeran del arbol y que nun se tenien por mui bones pa la sidra, esto ye, les llamaes mazanes del sapu. Depuues faciase mas d’una pasada peles pumaraes pa llamir o tirar con una piertiga les mazanes que quedaran nel arbol. Tamien podien tirase les mazanes esmenando o solmenando con fuerza l’arbol coles manes.
Una vegada rematada la panada, les mazanes habia que les tresportar a un sitiu onde se conservaren ensin perdese pa poder facer la mayanza mas tarde o, cuando convenia, llevales a dalgun llagar industrial que les mercaba pa facer sidra. Anguano, esti llabor de tresporte ye muncho mas practicu y facil, pero d’antiguo esti llabor, que llegaba a facese con carros de traccion animal, podia durar bastante tiempu, de manera qu’una familia podia andar carretando mazana hasta final d’anu o mas alla en dellos casos.
La mayanza
Les mazanes pa facer sidra llevense al llagar. Elli, hai que seleccionar les mazanes y meteles nos ochaos, pa saber con cuanto frutu pue cuntar la casa y cuanto hai que mayar de cada vez. Depuues, echense les mazanes nel duernu, que ye’l recipiente onde se maya. Anguano, mayense les mazanes xeneralmente con un aparatu llutricu, llamau mayadora, pero lo tradicional hasta hai unos anos yera echar les mazanes en duernu y mayales col mayu, que ye un mazu de madera de mangu llargu y cabeza anchona que ruempe y estrapalla la mazana.
El trabayu de mayar ye duru abondo y, poro, en tiempos pasaos faciase n’andecha. Xuntense entos los homes de les cases vecines y poniense a entrambos llaos del duernu, onde caun diba dando golpes col mayu pa desfacer la mazana. Coles mayadores modernes la cosa ye muncho mas rapido y comoda, porque les cuchielles que mueve’l motor mayen bien rapido les mazanes.
La mazana mayao echase con pales en pisu del aparatu llamau llagar, o seya, na masera, faciendo que queden bien puestes y colocaes les mazanes mayaes. Pa ello, usense pales de madera, anque tamien solien emplegase madrenes bien llimpies, en dellos casos con un pisu especial pa esta funcion. Por llagar entiendese tanto l’aparatu que val pa esprimir les mazanes como’l llocal onde s’alcuentra esi aparatu. Ye nesti local, en llagar, onde se fai la sidra. Hai que dir mayando hasta que’l llagar tea enllenu de la masa de mazanes mayaes. Entos, enriba d’esta masa ponense unos maderos llargos llamaos molleros y otros cortos llamaos carneros, que son los que presionen y fai que salga la sidra na parte baxa del llagar.
El resultau d’esti procesu llargu, y parte imprescindible de la cultura sidrera asturiana que debemos conocer y caltener, ye esa sidra tan rico que constitui un de los simbolos d’Asturies.
