Na colexata de San Pedru de Teberga consérvense les momies de dos personaxes famosos de la ilustre casa de Miranda.
El más vieyu llamóse Lope de Miranda y Ponce de León y foi’l primer marqués de Valdecarzana. Finó en Madrid nel añu 1688 y el so cadabre tuvo depositáu na cripta de los Monxos Bernardos de Madrid, per espaciu de cuarenta y dos años, siendo treslladáu a la colexata en 1731. Tuvo primero nuna sepultura adosada a la paré d’esti templu.
Más tarde, comprobada la estraordinaria momificación, construyóse una especie de corredor de fierro y colocóse naquel altor pa evitar la curiosidá de la xente.
La segunda momia ye de Pedro Analso de Miranda Ponce de León y Trelles, abá de Teberga y obispu de Teruel. Finó en Teruel en 1731 y los sos restos fueron enterraos na colexata de San Pedru en payares de 1733. Al cabu d’unos años comprobóse, ensin sabese les causes, que taba momificáu y el so sepulcru atraía la curiosidá de los visitantes. Pa evitalo, colocóse nel mesmu corredor de fierro, a notable altor, onde tamién xacía’l so pá.
Apocayá, ensin dulda p’atraición de curiosos, baxáronse les momies del llugar en que taben y fueron asitiaes en dos féretros a la manzorga del altar mayor.
