Los bolos asturianos en modalidá de cuatreada ye la práutica d’esti deporte más espardida n’Asturies. Tuvo la so primer Federación Asturiana nel añu 1933, siendo’l so primer presidente Emilio Zapico. Daquella celebrábense n’Asturies competiciones de Quintetos. Cola Guerra Civil el deporte prácticamente sumió, y nun ye hasta l’añu 1962 que los bolos cuntaron cola so propia Federación. Demientres esti tiempu les peñes bolístiques rexíense por sigo mesmes, participando nes competiciones y concursos patrocinaos sobremanera poles cases comerciales y pola antigua asociación cultural Educación y Descanso.
Esti organismu impulsó, dende 1940, dellos importantes campeonatos de pareyes, d’empreses y de Quintetos. En 1962 formóse la Rexonal Asturiana, encuadrada dientro de la Federación Española de Bolos y dientro del Conseyu Superior de Deportes, organismu que rixe na actualidá esti deporte.
Tolos años, nos diferentes pueblos d’Asturies y xeneralmente demientres les fiestes patronales, suelen organizase concursos y competiciones, destacando los torneos que se faen na FIDMA, el Memorial «Raúl» na llocalidá de Los Barreros o’l Memorial «Mier» na llocalidá de Turón. Demientres munchos años, una de les competiciones más importantes foi la de San Mateo, n’Uviéu, que se xugaba nel Campu San Francisco.
El xugador que más años figuró como vencedor, y unu de los más destacaos del so tiempu, foi Poloncio I, miembru de la Bolera «El Marotu», d’Olloniego. Poloncio I estableció tou un récor de bolos faciendo una tirada de cientu doce bolos con siete boles. Otru destacáu d’esti sistema fue Cajetilla, quiciabes el meyor xugador de tolos tiempos, morriendo en 1940. Anguaño alcontramos importantes figures d’esti deporte como son Pruneda o Bernardo. Nun podemos pesllar esti reportaxe ensin facer mención al que probablemente foi’l más regular, el xixonés Manolo Magdalena.
Los bolos asturianos son un deporte tan nuesu que sedría una traxedia perdelos. Hai que tener en cuenta que munches vegaes ye un trabayu desinteresáu con un eleváu númberu de persones que lo preparen too, animen a la mocedá a participar, dinamicen los torneos y que los sos rostros nun son visibles pal aficionáu. Eses son les verdaderes ayalgues d’esti deporte.
