Cola seronda, aporten les castañes a la viesca asturiana. Ye momentu, entós, del pote de castañes, un productu gastronómicu mui asturianu. Dende la Edá Media, esta comida calecía los cuerpos nos tiempos fríos. Sicasí, yera un platu espesáu con fariña y dalguna llegume, amás de dalgo de carne. La castaña yera unu de los alimentos que se ponía na pota y llega hasta anguaño, pero como un platu non tan conocíu. Esto débese a que la faba entró n’Asturies nel sieglu XVII y, entós, la castaña va perdiendo tarrén, mesmo qu’otros alimentos. Pue añadise tamién pataca. Como resultáu de too esto, tenemos el pote de castañes qu’anguaño conocemos y qu’agora queremos qu’esfrutes cola nuesa receta.
Ingredientes
– Mediu quilu de pataques
– Mediu quilu de castañes
– Dos chorizos
– Dos morcielles
– Un cachu de llacón
– Un cachu de panceta
– Un cachu de carne de gochu
– Unes fueyes de berza, repollu o col
– Azafrán
– Pimentón picante
– Sal
Preparación
Ponemos a cocer nuna pota con agua tol compangu: chorizos, morcielles, llacón, panceta y la carne y añedimos tamién la verdura. Dexar a fueu lentu hasta que la carne tea cuasí tienro, lo que pue tardar unos 45 minutos, aproximao.
Pulgamos les castañes y les pataques —éstes en cachinos— y ponémosles a cocer n’otra pota mientres 10 minutos.
Echamos les pataques y les castañes na pota del compangu y dexamos que se cocine too xunto hasta que tean blandies, removiendo de xemes en cuando.
